G‘ijduvon tumanida Xalq deputatlari tuman Kengashining yigirma beshinchi sessiyasi bo‘lib o‘tdi.
2026-04-03 21:55:00 / Yangiliklar
Sessiyaning kun tartibidagi birinchi masala doirasida tumanda jinoyatchilik va huquqbuzarliklarning oldini olish borasida 2026-yilning dastlabki 2 oyidagi faoliyat yuzasidan tuman prokurori N.Jo‘rayevning axboroti tinglandi. Qonun ustuvorligini ta’minlash, profilaktik ishlarni kuchaytirish va fuqarolarning huquqiy himoyasini yanada mustahkamlash yuzasidan aniq vazifalar belgilab olindi.
Shuningdek, “O‘zbekiston-2030” strategiyasi doirasida xotin-qizlarni har tomonlama qo‘llab-quvvatlash, ularning jamiyatdagi o‘rni va faolligini oshirish masalasi muhokama markazida bo‘ldi. Tuman oila va xotin-qizlar bo‘limi boshlig‘i I.Kamolovaning hisobotida bu borada amalga oshirilayotgan ishlar, yaratilayotgan imkoniyatlar va kelgusidagi ustuvor vazifalar atroflicha yoritildi.
Sessiyaning navbatdagi muhim masalasi sifatida ta’lim tizimini rivojlantirish masalasi ko‘rib chiqildi. Tuman maktabgacha va maktab ta’limi bo‘limi boshlig‘i H.Jumayevaning hisobotida yosh avlodni yuksak bilim va salohiyatga ega etib tarbiyalash borasida amalga oshirilayotgan ishlar alohida ta’kidlandi. Joriy yilning I choragida 8 ta oilaviy nodavlat tashkiloti tashkil etilib, 400 nafar bola uchun yangi o‘rinlar yaratildi.
Yil yakuniga qadar yana 300 nafar bola o‘rni yaratish rejalashtirilgani ta’kidlanib, bu boradagi ishlar davlat dasturlari asosida izchil davom ettirilishi qayd etildi. Bu esa kelajak avlodning har tomonlama barkamol bo‘lib voyaga yetishiga mustahkam zamin yaratadi.
“Fuqarolar tashabbusli byudjeti” jarayonining birinchi mavsumi yakunlari ham sessiyada alohida ko‘rib chiqildi. Aholi faolligini oshirish, ochiqlik va shaffoflikni ta’minlash asosida 14 ta loyiha g‘olib deb topilib, ularni amalga oshirish uchun 21 milliard 650 million so‘m mablag‘ yo‘naltirilishi belgilandi.
Sessiya yakunida Xalq deputatlari tuman Kengashi doimiy komissiyalarining hisobotlari tinglandi. O‘tgan davr mobaynida yuzlab muhim masalalar muhokama qilinib, ularning yechimi bo‘yicha aniq choralar ko‘rilgani qayd etildi. Kun tartibidagi barcha masalalar deputatlar ishtirokida batafsil muhokama qilinib, qonuniylik, adolat va xalq manfaatlari ustuvorligi asosida tegishli qarorlar qabul qilindi.