Hududlarda jinoyatchilikning oldini olish bo‘yicha ochiq muloqotlar o‘tkazilmoqda!
2026-03-15 14:05:00 / Yangiliklar
Mazkur uchrashuvlarning asosiy maqsadi jinoyatchilikning oldini olish, ayniqsa kiberjinoyatlar, firibgarlik holatlari hamda nizoli oilalarda yuzaga kelayotgan muammolarni barvaqt aniqlash va bartaraf etish masalalariga qaratilgan. Shuningdek, 2026-yilda tuman hududida sodir etilgan jinoyatlarning mazmun-mohiyati hamda ularning kelib chiqish sabablari yuzasidan batafsil tushuntirishlar berilmoqda.
Ochiq va samimiy ruhda o‘tayotgan muloqotlarda mahalla faollari, nuroniylar, ko‘cha vakillari hamda keng jamoatchilik vakillari faol ishtirok etmoqda. Fuqarolar tomonidan bildirilayotgan murojaatlar tinglanib, ularni hal etish yuzasidan tegishli mutasaddi rahbarlarga aniq vazifa va topshiriqlar berilmoqda.
Shuningdek, uchrashuvlar davomida fuqarolarning huquqiy savodxonligini oshirish, internet va ijtimoiy tarmoqlarda uchrayotgan turli firibgarlik va kiberxavf-xatarlardan ogoh bo‘lish bo‘yicha tushuntirish ishlari olib borilmoqda.
Yakunda aholiga profilaktik bukletlar tarqatilib, jinoyatchilikning oldini olish, kiberxavfsizlik qoidalariga amal qilish hamda oilalarda sog‘lom muhitni mustahkamlash yuzasidan muhim tavsiyalar berilmoqda. Bunday ochiq muloqotlar hududlarda tinchlik va osoyishtalikni mustahkamlash hamda fuqarolar bilan yaqin hamkorlikni rivojlantirishga xizmat qilmoqda.