Farg‘onada O‘zbekiston xalq shoiri Oxunjon Hakimov hamda adib va shoir, jamoat arbobi Yo‘ldosh Sulaymon tavalludining 90 yilligi munosabati bilan anjuman tashkil etildi
2025-09-29 17:45:00 / Yangiliklar
Ikki ulug‘ yozuvchi garchi nasr va nazmda o‘lmas asarlar yaratgan bo‘lsalarda, umrlarini matbuot bilan bog‘lagan. Yo‘ldosh Sulaymon uzoq yillar "Farg‘ona haqiqati" gazetasining adabiyot bo‘limini boshqargan. O‘nlab yosh yozuvchi shoir, iste’dod egalarining birinchi asarlari aynan Yo‘ldosh Sulaymon tahriri ostida gazetada chop etilgan. Yo‘ldosh Sulaymonning "Katta yo‘lga chiqquncha", "Sen mening quyoshimsan" kabi ocherklar to‘plamlarida oddiy insonlar ichki dunyosi mahorat bilan ochib beriladi. Adibning "Dardim sig‘mas dunyoga" she’riy to‘plami, "Subhidam", "Vafo" romanlari o‘z vaqtida adabiyot osmonida voqelik bo‘lgan.
Oxunjon Hakimov "Farg‘ona haqiqati" va mamlakatning yetakchi gazetasida bir necha yillar fidoyilik bilan mehnat qildi. Uning felyetonlari o‘sha zamon korchalon, poraxo‘r, korrupsionerlarini ayovsiz fosh qilgan. Tahliliy maqolalari hamon yosh jurnalistlarning mahorat maktablarida o‘rganiladi. Yozuvchiga katta shuhrat keltirgan yirik she’rlari, qissa va romanlari, qator pyesalaridagi ko‘tarilgan muammolar bugun ham dolzarb.
Ikki ijodkorning nomi, ular yaratgan badiiy asarlar asrlar davomida o‘zbek jurnalistikasi va adabiyotida, navqiron avlod qalbida ehtirom bilan yodga olinadi. Anjuman davomida buni yana bir bor e’tirof etildi.