Quvasoyda viloyatimizda yagona bo‘lgan “Ona uyi” markazi ish boshladi
2025-09-11 09:50:00 / Yangiliklar
Markazda 6 oylik homiladorlik davridan boshlab, jumladan ilk farzandini dunyoga keltirayotgan ayollar, 4 yoshgacha bo‘lgan farzandi bor ayollar hamda bolalardan voz kechish arafasida turgan homilador ayollarga qo‘llab-quvvatlash xizmati ko‘rsatiladi. Ularga psixologik ko‘mak, tibbiy xizmat, hujjatlarni tiklash va huquqiy maslahat, ta’lim va malaka oshirish, amaliyot va ish bilan ta’minlash kabi yo‘nalishlarda yordam beriladi.
Kelgusida markazda tikuvchilik va turli kasb-hunar kurslari tashkil qilinib, yuzlab onalarni mustaqil hayotga tayyorlash rejalashtirilgan. Bu esa nafaqat ularning moddiy ehtiyojlarini ta’minlaydi, balki ma’naviy quvvat va yangi hayotga ishonch bag‘ishlaydi.
Ayni paytda mazkur loyiha Toshkent, Buxoro, Andijon, Samarqand, Chirchiq va Quvasoy shaharlarida tajriba tariqasida yo‘lga qo‘yilgan bo‘lib, kelgusida respublikaning barcha hududlarida tashkil etilishi mo‘ljallanmoqda.
Tadbir davomida ramziy tasma qirqilib, mehmonlar “Ona uyi”da yaratilgan qulayliklar bilan tanishdilar.