Har qarich yer — daromad manbai: “Sobirjon” mahallasi tajribasi
2026-02-04 17:00:00 / Yangiliklar
Mahalladagi tomorqachilarning aksariyati har qarich yerdan unumli foydalanib, mo‘may daromad topish hadisini olgan.
Mazkur mahallada istiqomat qiluvchi Ikromjon Jo‘rayev ham tomorqadan foydalanishda o‘ziga xos tajribaga ega sohibkorlardan. U 8 sotix tomorqasida 4 ta issiqxona tashkil etib, yilning to‘rt faslida ham gul yetishtirish bilan shug‘ullanadi.
Qish chillasiga qaramay, bahor nafasi ufurib turgan issiqxonalarda tomchilatib sug‘orish tizimi yo‘lga qo‘yilgan. Ayni paytda bu yerda qariyb 60 turdagi 100 ming tupdan ziyod tuvak va hovli gullari parvarishlanmoqda.
Bir dona gul ko‘chati o‘rtacha 5-10 ming so‘mdan, tuvakdagi gullar esa 40-50 ming so‘mdan sotilmoqda. Shu tariqa mirishkor oila bir mavsumda kichik tomorqadan 200 million so‘mdan ortiq daromad olish imkoniga ega bo‘lmoqda.
Asosiysi, bu xonadonda yetishtirilayotgan bir-biridan chiroyli va xushbo‘y gullar nafaqat Farg‘onada, balki qo‘shni viloyatlar bozorlarida ham xaridorgir.