Farg‘onada hududlarning investitsiyaviy jozibadorligi oshmoqda
2026-01-28 22:45:00 / Yangiliklar
Viloyat hokimligida O‘zbekiston Respublikasi Bosh vazirining o‘rinbosari Jamshid Xodjayev boshchiligidagi Hukumat komissiyasi hamda viloyat hokimi Xayrullo Bozorov ishtirokida Farg‘ona viloyatini ijtimoiy-iqtisodiy rivojlantirish, sarmoyalarni keng jalb etish, loyihalarni o‘z vaqtida amalga oshirish, tadbirkorlikni qo‘llab-quvvatlash borasida amalga oshirilayotgan ishlarga bag‘ishlangan yig‘ilish bo‘lib o‘tdi.
Unda tegishli vazirlik va idoralar vakillari, shahar va tumanlar hokimlari hamda ularning investitsiya masalalari bo‘yicha o‘rinbosarlari ishtirok etdilar.
Yig‘ilishda 2026-yilda shahar va tumanlarda amalga oshirilishi rejalashtirilgan investitsiya loyihalari taqdimot qilindi.
2026-yilda Farg‘ona viloyatida jami 4,2 milliard dollarlik investitsiyalarni o‘zlashtirish rejalashtirilgan. Mazkur mablag‘lar doirasida viloyat bo‘yicha jami 1 424 ta yangi loyiha ishga tushirilishi, natijada 52 mingta yangi ish o‘rni yaratilishi ko‘zda tutilgan.
Yig‘ilishda shahar va tuman hokimlari 2025-yilda o‘zlashtirilgan xorijiy investitsiyalar rejasining bajarilishi va 2026-yilda o‘z hududlaridagi drayver sohalar — sanoat, qishloq xo‘jaligi va xizmat ko‘rsatish yo‘nalishlaridagi yirik loyihalar haqida batafsil axborot berdilar.
Bosh vazir o‘rinbosari Jamshid Xodjayev har bir loyihaning sifati, uni amalga oshirish muddatlari va eksport salohiyatiga to‘xtalib o‘tdi. Loyihalarni ishlab chiqishda nafaqat son, balki yuqori texnologiyali ishlab chiqarishni yo‘lga qo‘yish muhimligi ta’kidlandi.
Viloyat hokimi Xayrullo Bozorov esa loyihalarni ishlab chiqishdan boshlab, investorlar uchun qulay muhit yaratishgacha bo‘lgan barcha jarayonlarni tizimli nazorat qilish bo‘yicha shahar va tumanlar hokimlariga aniq vazifalar yukladi.
Bu tashabbuslar Farg‘ona viloyatining 2026-yildagi investitsiyaviy jozibadorligini yanada oshirishga qaratilgan.