Farg‘onada “Raqamli avlod qizlari” Respublika tanlovining viloyat bosqichiga start berildi
2026-01-06 13:50:00 / Yangiliklar
Tadbirda viloyat Maktabgacha va maktab ta’limi boshqarmasi boshlig‘i Sherzod Dolimov so‘z olib, tanlov ishtirokchilariga omad tiladi. Shuningdek, tanlovning mazmun-mohiyati, yurtimizda yoshlar, ayniqsa, xotin-qizlarning raqamli texnologiyalar va innovatsiyalar sohasidagi faolligini oshirishga qaratilayotgan e’tibor haqida to‘xtalib o‘tdi.
“Raqamli avlod qizlari” tanlovi raqamli texnologiyalar va innovatsiyalar sohasiga qiziqish bildirayotgan yoshlarni aniqlash, ularni qo‘llab-quvvatlash hamda rag‘batlantirish maqsadida 2021-yildan buyon an’anaviy tarzda o‘tkazib kelinmoqda.
Bu yil ham tanlovning shahar va tuman bosqichlarida 9 mingdan ziyod iqtidorli qizlar ishtirok etib, ularning 161 nafari viloyat bosqichiga yo‘llanmani qo‘lga kiritgani qayd etildi.
Ochilish marosimidan so‘ng hakamlar hay’ati tomonidan 16–20 va 21–30 yosh toifalarida bo‘lgan tanlov ishtirokchilarining ta’lim, sun’iy intellekt, “yashil iqtisodiyot” hamda iqlim o‘zgarishi yo‘nalishlarida tayyorlagan innovatsion loyihalarini baholashga kirishildi.
Ikki kun davom etadigan tanlov yakunlariga ko‘ra, g‘oliblar Respublika bosqichida Farg‘ona viloyati sharafini himoya qiladi.