Олтита туманда “Янги Ўзбекистон қиёфаси” кириб борадиган маҳаллалардаги ишлар тақдимот қилинди
2025-10-17 22:00:00 / Янгиликлар
Президентимиз раислигида ўтказилган видеоселектор йиғилишида маҳалла тизимидаги ислоҳотларни янги босқичга олиб чиқиш, жойларда ишларни самарали ташкил этиш ҳамда инфратузилмани яхшилаш бўйича муҳим вазифалар белгиланган эди.
Хусусан, қарор билан "Янги Ўзбекистон қиёфаси" кириб борадиган 33 та туман ва 330 та оғир тоифадаги маҳалла белгиланди. Ушбу туманларнинг ҳар бирига 100 миллиард сўмдан, маҳаллаларнинг ҳар бирига эса 5 миллиард сўмдан маблағ ажратилиши белгиланди. Шунингдек, вилоят ҳокимларига иккитадан, туман ҳокимларига эса биттадан оғир тоифадаги маҳаллада аҳоли турмушини тубдан яхшилаш бўйича аниқ натижага эришиш вазифаси юклатилди.
Мазкур вазифалар ижроси доирасида Сурхондарё вилоятида учта туманда “Янги Ўзбекистон қиёфасидаги туман”, Термиз шаҳри ҳамда ҳар бир туманда иккитадан маҳаллада “Тараққиёт ва етакчилик маскани” дастурини амалга ошириш белгиланган.
Шу мақсадда вилоят ҳокими Улуғбек Қосимов Жарқўрғон туманидан кейин Қумқўрғон, Шўрчи, Олтинсой, Денов, Сариосиё ва Узун туманларига ташриф буюриб, танлаб олинган оғир тоифадаги маҳаллаларда амалга ошириладиган ишлар, инфратузилмани яхшилаш, “драйвер” лойиҳаларни рўёбга чиқариш, янги иш ўринлари яратиш ва “маҳалла бюджети”ни мустаҳкамлашга қаратилган тақдимотлар билан танишди.
Ташрифлар давомида ҳар бир маҳаллага ажратилаётган маблағлардан самарали фойдаланиш, аҳолини қийнаётган долзарб муаммоларни аниқлаб, уларни манзилли ҳал этиш, одамлар ўзгаришларни кундалик ҳаётларида ҳис этишлари лозимлиги таъкидланди. Шунингдек, қўшимча имкониятларни аниқлаш ва амалга оширилаётган лойиҳаларни такомиллаштириш бўйича тавсия ва топшириқлар берилди.
Тадбирлар давомида ҳудудларда фаолият юритаётган “Маҳалла еттилиги” аъзолари, жумладан, маҳалла раисларининг фаол меҳнати эътироф этилди ва уларга эсдалик совғалар топширилди.
Шунингдек, мутасаддилар иштирокида асосий турдаги озиқ-овқат маҳсулотлари захирасини яратиш, аҳоли эҳтиёжлари ва бозор талабидан келиб чиқиб уларни савдога чиқариш, нархларнинг сунъий ошиб кетишини олдини олиш бўйича чора-тадбирлар муҳокама қилиниб, тегишли вазифалар белгилаб олинди.