Япония компаниялари билан Сурхондарёда инвестициявий ҳамкорликнинг янги йўналишлари муҳокама қилинди
2026-11-11 22:00:00 / Янгиликлар
Сурхондарё вилояти ҳокими Улуғбек Қосимов Япониянинг Ўзбекистондаги элчихонаси вакиллари, шунингдек, Marubeni Corporation, Mitsui & Co., Mitsubishi Power, Sumitomo Corporation, Toyota Tsusho Corporation, Toyota Central Asia компаниялари ҳамда JICA ва JETRO халқаро ташкилотлари раҳбарлари билан учрашув ўтказди.
Мулоқотда вилоятнинг иқтисодий имкониятлари ва япон инвесторлари учун истиқболли йўналишлар тақдим этилди. Хусусан, энергетика соҳасига инвестиция жалб қилиш, меҳнат миграцияси соҳасида ҳамкорликни кенгайтириш, Сурхондарёнинг тарихий-маданий мероси ва туристик салоҳиятини Японияда тарғиб қилиш масалалари кўриб чиқилди.
Шунингдек, Toyota компаниясининг Термиз шаҳрида расмий савдо ва кўргазма марказини ташкил этиш ташаббуси илгари сурилди.
Учрашув якунида билдирилган ташаббусларнинг иқтисодий ва амалий имкониятларини ўрганиш, истиқболли йўналишлар бўйича ҳамкорлик механизмларини ишлаб чиқиш ҳамда кейинги қадамларни белгилашга келишиб олинди.