Халқаро анжуманда Сурхондарё ва трансчегаравий ҳудудлардаги “афғон шамоли” муҳокама қилинди
2026-09-16 15:00:00 / Янгиликлар
Хитойнинг Сиан архитектура ва технология университетида Хитой, Ўзбекистон ва Россия олий таълим муассасаларининг етакчи олимлари иштирокида халқаро академик алмашинув семинари бўлиб ўтди.
Тадбирда Термиз давлат муҳандислик ва агротехнологиялар университети ректори, профессор Расул Тўраев бошчилигидаги делегация ҳамда Термиз давлат педагогика институти проректори, профессор Шаҳноза Қулдашева иштирок этди.
Профессор Шаҳноза Қулдашева “Сурхондарё вилояти ва Ҳайратон — Мозори Шариф трансчегаравий ҳудудида қумли бўронлар хавфининг олдини олиш ва унга қарши курашиш” мавзусида маъруза қилди.
Маърузада чанг-тўзонлар, қумли бўронлар ва “афғон шамоли”нинг юзага келиш омиллари, шунингдек, уларнинг атроф-муҳит ва аҳоли саломатлигига таъсири таҳлил қилинди.
Хусусан, Ҳайратон — Мозори Шариф йўналишидаги 150 минг гектар қумли ҳудуд экологик жиҳатдан таҳлил қилиниб, “афғон шамоли” ўрганилгани ҳамда халқаро тажрибалар асосида ишлаб чиқилган, муаллифлик патенти билан ҳимояланган “Ҳаво тозалагич” қурилмаси ва сорбентлари муҳим илмий-амалий асос сифатида эътироф этилди.
Анжуман доирасида Термиз давлат муҳандислик ва агротехнологиялар университети Ипак йўли архитектура ва технология университетлари халқаро альянсига расман аъзо бўлди.
Шунингдек, “яшил қурилиш”, кам углеродли материаллар, қуёш энергетикаси ва сув тежовчи технологиялар йўналишларида қўшма тадқиқотлар, академик алмашинув, стажировкалар ва грант лойиҳаларини ривожлантириш бўйича келишувларга эришилди.
Муҳокамалар якунида трансчегаравий чанг-тўзонлар, саноат чанги ва ҳаво оқимларини ўрганиш бўйича қўшма илмий-тадқиқот ва амалий лойиҳаларни амалга ошириш белгиланди.