Бугун Сурхондарё вилояти ҳокими Улуғбек Қосимов Хитойнинг “United Energy Group” компанияси делегациясини қабул қилди.

Учрашувда Сурхондарё вилоятида суюлтирилган газ ишлаб чиқариш, мавжуд углеводород ресурсларидан самарали фойдаланиш, замонавий технологияларни жорий этиш ҳамда ушбу йўналишда инвестиция лойиҳаларини амалга ошириш масалалари муҳокама қилинди.

Томонлар вилоятнинг нефть-газ салоҳиятидан келиб чиқиб, юқори қўшилган қийматга эга маҳсулотлар ишлаб чиқаришни йўлга қўйиш, ишлаб чиқариш қувватларини модернизация қилиш ва энергия ресурсларидан самарали фойдаланиш бўйича ҳамкорлик истиқболларини кўриб чиқдилар.

Шунингдек, лойиҳани амалга ошириш учун зарур инфратузилмани шакллантириш, инвестиция ҳажми ва технологик ечимларни аниқлаш, хомашё таъминоти ҳамда маҳсулотни ички ва ташқи бозорларга чиқариш имкониятлари юзасидан фикр алмашилди.

Учрашув якунида лойиҳанинг техник-иқтисодий параметрларини чуқур ўрганиш, мавжуд имкониятларни баҳолаш ва ҳамкорликнинг кейинги босқичларини белгилаш бўйича келишувларга эришилди.

Мазкур ташаббусни амалга ошириш Сурхондарёда нефть-газ тармоғида янги ишлаб чиқариш қувватларини яратиш, инвестицияларни жалб этиш, янги иш ўринларини ташкил қилиш ҳамда ҳудуднинг саноат салоҳиятини оширишга хизмат қилади.