Сурхондарёда транспорт-логистика салоҳиятини юксалтириш масалалари юзасидан амалий мулоқот ўтказилди
2026-07-06 19:00:00 / Янгиликлар
Сурхондарё вилоятида ташқи иқтисодий алоқаларни кенгайтириш, халқаро транспорт йўлакларидан самарали фойдаланиш ҳамда экспорт-импорт операцияларини янада жадаллаштиришга қаратилган ислоҳотлар изчил давом этмоқда. Бу жараёнда транспорт-логистика инфратузилмасини такомиллаштириш ва божхона маъмуриятчилигини замонавий талаблар асосида ривожлантириш устувор йўналишлардан бири ҳисобланади.
Шу мақсадда Сурхондарё вилояти Божхона бошқармаси ташаббуси билан транспорт-логистика соҳасини янада ривожлантиришга бағишланган очиқ мулоқот ташкил этилди. Унда логистика компаниялари, экспорт-импорт фаолияти билан шуғулланувчи тадбиркорлар, ташқи иқтисодий фаолият иштирокчилари, ваколатли давлат идоралари ҳамда соҳа экспертлари иштирок этди.
Мулоқот давомида божхона расмийлаштируви жараёнларини янада соддалаштириш, чегара божхона постларида хизматлар тезкорлиги ва сифатини ошириш, рақамли технологиялар ҳамда хавфларни бошқариш тизимларини кенг жорий этиш, транспорт-логистика инфратузилмасининг ўтказувчанлик қобилиятини юксалтириш, тадбиркорлар мурожаатларини тезкор ҳал этиш орқали қулай ишбилармонлик муҳитини шакллантириш масалалари муҳокама қилинди.
Қайд этилганидек, Сурхондарёнинг Афғонистон билан чегарадош ҳудуд сифатидаги геостратегик ўрни минтақа давлатлари ўртасидаги савдо-иқтисодий ҳамкорликни кенгайтириш, транзит салоҳиятини тўлиқ ишга солиш ҳамда янги логистика занжирларини шакллантириш учун муҳим имкониятлар яратмоқда.
Тадбир давомида Афғонистондан импорт қилинаётган мева-сабзавот ва қуруқ меваларни замонавий технологиялар асосида саралаш, қадоқлаш ҳамда ташқи бозорларга қайта экспорт қилиш бўйича амалга оширилаётган инвестиция лойиҳалари тақдим этилди. Таъкидланганидек, бундай қўшилган қиймат занжирларини яратиш экспортбоп маҳсулотлар ҳажмини кўпайтириш, маҳсулот рақобатбардошлигини ошириш, янги иш ўринлари ташкил этиш ва ҳудуднинг экспорт салоҳиятини мустаҳкамлашда муҳим омил бўлиб хизмат қилади.
Тадбир якунида тадбиркорлар томонидан билдирилган таклиф ва мурожаатлар ҳар томонлама кўриб чиқилиб, мавжуд муаммоларни бартараф этиш ҳамда ташқи иқтисодий фаолият иштирокчилари учун янада қулай шарт-шароитлар яратишга қаратилган аниқ амалий чора-тадбирлар белгилаб олинди.