Сурхондарё вилояти ҳокимлиги

Termiz shahridagi “Yoshlar markazi”da Surxondaryo viloyati hokimi Ulug‘bek Qosimov rahbarligida yig‘ilish o‘tkazildi. Unda oilaviy tadbirkorlik va boshqa dasturlar doirasida mahallalardagi hokim yordamchilari tomonidan ajratilgan kredit mablag‘larining qaytarilishi, ularni qayta moliyalashtirishga yo‘naltirish masalalari muhokama qilindi.

Yig‘ilishda tijorat banklari rahbarlari, shahar va tumanlar hokimlarining birinchi o‘rinbosarlari hududlardagi mavjud holat yuzasidan axborot berdi. Mas’ullarga kredit mablag‘lari qaytarilishini ta’minlash, aholi bandligini oshirish va tadbirkorlikni qo‘llab-quvvatlash bo‘yicha tegishli vazifalar belgilab berildi.

Shuningdek, 2 318 nafar ishsiz fuqaroning o‘zini o‘zi band qilishi hamda barqaror daromad manbaiga ega bo‘lishini ta’minlash maqsadida ssuda asosida 2 711 ta asbob-uskuna va jihoz topshirildi.

Shundan so‘ng, Jarqo‘rg‘on tumanida yashovchi Eshmurod Choriyevga Prezident tomonidan ajratilgan “Haj safari” yo‘llanmasi tantanali ravishda topshirildi. Shuningdek, Sariosiyo, Bandixon, Qumqo‘rg‘on va Angor tumanlarida ham sertifikatlar o‘z egalariga yetkazildi.

Tashrif doirasida Loyqand mahallasida yashovchi Lola momoning ipak qurti parvarishidagi ko‘p yillik tajribasi bilan tanishildi. Shuningdek, “Fabullo stroy servis” MCHJning gazobeton mahsulotlari ishlab chiqarish faoliyati ko‘zdan kechirildi.

Shu yerning o‘zida mutasaddilar tomonidan “Yangi O‘zbekiston qiyofasi” dasturiga kiritilgan mahallalarda amalga oshirilayotgan infratuzilma ishlari, davlat aktivlari hisobidagi bo‘sh turgan ob’yektlar hamda istiqbolli loyihalar yuzasidan hisobotlar taqdim etildi.

Yig‘ilishda sanoatda mahalliylashtirish loyihalari ijrosi va belgilangan vazifalar ham muhokama qilinib, faoliyatsiz korxonalarni qayta tiklash bo‘yicha amalga oshirilayotgan ishlar tahlil qilindi. Mas’ullarga bu borada ishlarni tizimli tashkil etish yuzasidan tegishli topshiriqlar berildi.

O‘rganishlar yakunida “Trakk 777” MCHJning chorvachilik kompleksi faoliyati bilan tanishildi. Qayd etilganidek, loyiha doirasidagi qoramollar Surxondaryo viloyati hokimining Novosibirsk shahriga amalga oshirgan tashrifi davomida erishilgan kelishuvlar asosida olib kelingan.