Сурхондарё вилояти ҳокимлиги

Бугун Президентимиз “Яшил макон” умуммиллий лойиҳаси доирасида кўчат экиш тадбирида иштирок этиб, Миллий дендрология боғини барпо этишга старт берди. Тадбир республика бўйлаб кенг қамровда ташкил этилиб, 14 та ҳудуд студиялари видеоалоқа орқали уланди ва жойларда ҳам яшил ҳудудлар барпо этиш ишлари бошланди.

Давлатимиз раҳбарининг яқинда имзолаган фармонига мувофиқ, 2030 йилга қадар республикада яшиллик даражасини 30 фоизга, жон бошига тўғри келадиган яшил ҳудудлар ҳажмини эса 10 квадрат метрга етказиш устувор вазифа сифатида белгиланган. Ушбу мақсадлар доирасида ҳудудларда йирик экологик лойиҳалар изчил амалга оширилмоқда. Жумладан, Сурхондарё вилоятида 10 минг гектар майдонда “яшил макон” барпо этиш режалаштирилган.

Сурхондарё вилояти студиясидан вилоят ҳокими Улуғбек Қосимов, нуронийлар, фаоллар ва мутасаддилар Ангор туманида ташкил этилаётган “яшил белбоғ” лойиҳаси ҳудудида дарахт кўчатлари экишди.

Шундан сўнг, Қизириқ туманида Такия ота зиёратгоҳини ободонлаштириш, унинг атрофида савдо ва хизмат кўрсатиш нуқталарини ташкил этиш бўйича белгиланган вазифалар ижроси билан танишилди. Масъуллар ушбу ишлар, шунингдек, туманда “Тараққиёт ва етакчилик маскани” дастури доирасида амалга оширилаётган лойиҳалар юзасидан ахборот берди. Инфратузилмани яхшилаш, тадбиркорликни қўллаб-қувватлаш ва аҳоли фаровонлигини оширишга қаратилган лойиҳаларни жадаллаштириш бўйича топшириқлар берилди.

Шунингдек, “Асил-Авто-Сервис” МЧЖ томонидан қурилган хусусий клиникани жиҳозлаш ишлари кўздан кечирилиб, тадбиркорнинг кредит билан боғлиқ муаммоларини ҳал этиш юзасидан масъулларга тегишли вазифалар юклатилди.

Кейинги манзилда вилоят ҳокими аҳоли бандлигини таъминлаш ва экспортни қўллаб-қувватлаш вазифалари доирасида маҳаллалардаги ҳоким ёрдамчилари, логистика марказлари ва ишлаб чиқариш лойиҳалари раҳбарлари, шунингдек, таълим ва тиббиёт муассасалари ҳамда ҳарбий қисмларга аутсорсинг хизмати кўрсатувчи корхоналар масъуллари билан учрашув ўтказди.

Учрашув аввалида 31 нафар ишсиз фуқарога ссуда асосида маҳаллаларда етиштирилаётган маҳсулотларни жамлаш ва ташиш хизматларини йўлга қўйиш мақсадида мотороллерлар топширилди.

Мулоқот давомида ишлаб чиқариш ҳажмларини ошириш, маҳсулот етиштиришни кўпайтириш, экспортни кенгайтириш, шунингдек, аутсорсинг хизматлари орқали озиқ-овқат маҳсулотларини етказиб беришнинг бугунги ҳолати муҳокама қилинди. Таъминотчи корхоналар фаолиятини қатъий назоратга олиш, озиқ-овқатлар таркибида табиий маҳсулотлар улушини ошириш, сифатсиз ва зарарли маҳсулотларни истеъмолдан чиқариш ҳамда сифат назоратини кучайтириш бўйича топшириқлар берилди.

Вилоят раҳбари ҳудудлардаги таълим муассасаларида озиқ-овқат таъминоти билан боғлиқ кузатилган ҳолатларни қайд этиб, бундай ҳолатларнинг олдини олиш мақсадида СЭС, тиббиёт ва бошқа мутасадди идораларга таъминот жараёнларини қатъий назоратга олиш, маҳсулот сифати ва яроқлилик муддатини таъминлаш юзасидан вазифалар белгилаб берди.