Табрик
2026-03-12 16:55:00 / Янгиликлар
Барчангизни юртимиз узра уфуриб турган файзли баҳор айёми билан самимий қутлайман. Айниқса, Ватан олдидаги муқаддас бурчини адо этиш учун ҳарбий хизмат сафига кузатилаётган азиз ва мард йигитларимизни чин қалбимдан табриклайман.
Бугунги кунда мамлакатимизда ёш авлодни ҳар томонлама баркамол, юксак маънавиятли, Ватанга садоқат руҳида тарбиялаш давлат сиёсатининг устувор йўналишларидан бири ҳисобланади. Муҳтарам Президентимиз таъкидлаганидек:
“Ватан ҳимояси – ҳар бир йигитнинг нафақат бурчи, балки юксак шараф ва муқаддас масъулиятидир.”
Азалдан Сурхондарё воҳаси мард ва жасур ўғлонлари билан ном қозонган. Воҳамиз йигитлари қаерда бўлмасин, ўзларининг жасорати, бирсўзлиги, қатъиятлилиги ва юртга садоқати билан эл-юрт ҳурматига сазовор бўлиб келмоқда.
Бугун ҳарбий хизмат сафига кириб бораётган сиз, азиз йигитлар, ана шу шарафли анъаналарнинг муносиб давомчилари ҳисобланасиз. Юртимиз сарҳадларини ҳимоя қилиш, халқимиз тинчлиги ва осойишталигини таъминлашдек улуғ ва масъулиятли вазифа энди сизларнинг зиммангизга тушмоқда.
Юртбошимиз таъкидлаганидек:
“Қудратли армия — мамлакатимиз мустақиллиги, халқимиз тинч ва осуда ҳаётининг мустаҳкам кафолатидир.”
Шу маънода, ҳарбий хизмат мактаби ҳар бир йигит учун нафақат жисмоний ва ҳарбий тайёргарлик, балки ирода, матонат, ватанпарварлик ва фидойилик мактабидир.
Ҳурматли ота-оналар!
Бугун сизлар меҳр ва садоқат билан тарбиялаб, улғайтирган фарзандларингиз Ватан ҳимояси йўлида хизмат қилишдек юксак шарафга муяссар бўлмоқда. Бу — ҳар бир оила учун катта ифтихор ва юксак шарафдир.
Сизлар тарбиялаган мард ва жасур йигитлар юртимиз тинчлиги, халқимиз осойишталиги ва мамлакатимиз келажаги учун муносиб хизмат қилишларига ишончим комил.
Азиз воҳамиз йигитлари!
Сизлар ҳарбий хизматни адо этар экансиз, Ватан олдидаги бурчингизга содиқ қолиб, сарҳадларимизни кўз қорачиғидек асрашингизга, ҳарбий интизомга қатъий риоя этишингизга ва командирларингиз кўрсатмаларини сидқидилдан бажаришингизга ишонаман.
Шу билан бирга, сизлар хизмат қилаётган юртда сизларнинг ота-онангиз, опа-сингилларингиз, яқинларингиз ва бутун халқимиз тинч ва осуда ҳаёт кечираётганини ҳамиша ёдда тутинг.
Юртбошимиз таъкидлаганидек:
“Ёшларимизнинг Ватанга садоқатли, мард ва жасур бўлиб камол топиши – Янги Ўзбекистон келажагининг мустаҳкам пойдеворидир.”
Ишонаманки, сизлар ҳарбий хизмат давомида юксак интизом, жасорат ва матонат намунасини кўрсатиб, ўзингизга билдирилган ишончни тўла оқлайсиз.
Фурсатдан фойдаланиб, сизларга мустаҳкам соғлик, куч-ғайрат, матонат ва улкан ютуқлар тилайман. Ватан олдидаги шарафли бурчингизни муносиб адо этиб, эсон-омон оилаларингиз бағрига қайтишингизни тилаб қоламан.
Юртимиз тинч, осмонимиз мусаффо, сарҳадларимиз мустаҳкам бўлсин!
Эътиборингиз учун раҳмат!