Сурхондарё вилояти ҳокимлиги

Prezidentimiz qarori bilan tasdiqlangan “Taraqqiyot va yetakchilik maskani” dasturi doirasida “Yangi O‘zbekiston qiyofasidagi tuman”ga aylantiriladigan hududlar qatoriga Qiziriq tumani ham kiritilgan. Dastur asosida hududda sanoat, xizmat ko‘rsatish va qishloq xo‘jaligi tarmoqlarini rivojlantirish uchun qulay shart-sharoitlar yaratish, aholi uy-joylari hamda ijtimoiy soha ob’yektlarini “yashil tamoyillar” asosida qurish, rekonstruksiya qilish va ta’mirlash, ichimlik suvi hamda issiqlik ta’minotida resurs tejovchi infratuzilmani jadal rivojlantirish, ichki yo‘llar, piyodalar va veloyo‘laklar barpo etish, aholi gavjum maskanlarni obodonlashtirish hamda hududni ishsizlik va kambag‘allikdan xoli hududga aylantirish kabi ustuvor vazifalar belgilangan.

Shuningdek, davlat rahbarining 2022 yil 30 dekabrdagi “Respublika hududlarini toifalarga ajratish va tadbirkorlikni qo‘llab-quvvatlashning tabaqalashtirilgan tizimini joriy etish chora-tadbirlari to‘g‘risida”gi 287-sonli Farmoniga muvofiq Qiziriq tumani 5-toifaga kiritilgan. Mazkur Farmon asosida tumanda ro‘yxatdan o‘tgan va faoliyat yuritayotgan tadbirkorlik sub’yektlari uchun 2026 yil 1 yanvardan 2028 yil 1 yanvarga qadar bir qator soliq imtiyozlari belgilangan. Xususan, foyda solig‘i, aylanmadan olinadigan soliq hamda ijtimoiy soliq 1 foiz miqdorida, yuridik shaxslarning mol-mulk va yer solig‘i esa hisoblangan summaning 50 foizi miqdorida to‘lanishi nazarda tutilgan.

Bugun Surxondaryo viloyati hokimi Ulug‘bek Qosimov hududlarga tashrifini Qiziriq tumanida davom ettirib, dastur doirasida amalga oshirilayotgan ishlar bilan tanishdi. Xususan, “Oqjar” mahallasida 5 gektar maydonda barpo etilayotgan, 3 mingtaga yaqin ish o‘rni yaratish imkoniyatiga ega “Mall” savdo kompleksi qurilishi ko‘zdan kechirildi. Mazkur loyiha shu vaqtgacha qarovsiz qolgan va foydalanilmagan kollektor hududini zamonaviy drenaj usullari asosida qayta tashkil etish orqali shakllantirilgan maydonda amalga oshirilmoqda.

Mavjud imkoniyat va resurslardan samarali foydalangan holda mazkur loyihani tez fursatlarda ishga tushirish, tadbirkorga yaqindan amaliy ko‘mak ko‘rsatish yuzasidan mas’ullarga tegishli topshiriqlar berildi.

Shundan so‘ng, “Shodlik” va “Qishloq qozon” mahallalarida amalga oshirilishi rejalashtirilgan yirik loyihalar taqdimoti bilan tanishildi. Jumladan, ko‘p qavatli turar joylar, savdo va xizmat ko‘rsatish ob’yektlari, amfiteatr hamda istirohat bog‘i barpo etish bo‘yicha rejalar yuzasidan mas’ullar axborot berdi. Shuningdek, tumanda faoliyat yuritmayotgan korxonalarni sog‘lomlashtirish, sanoat salohiyatini oshirish hamda tadbirkorlarni moliyaviy qo‘llab-quvvatlash bo‘yicha ustuvor vazifalar belgilab berildi.

Keyingi manzilda “Takiya” mahallasini “Yangi O‘zbekiston qiyofasidagi mahalla”ga aylantirish bo‘yicha ishlab chiqilgan loyihalar va ularning ijrosi o‘rganildi. Xususan, avvalgi tashriflarda berilgan topshiriqlar asosida Takiya ota ziyoratgohi atrofini obodonlashtirish, hududda tadbirkorlik loyihalarini amalga oshirish hamda mazkur maskanni aholi va ziyoratchilar uchun gavjum hududga aylantirish ishlari ko‘zdan kechirildi.

Mutasaddilarga har bir mahalla bo‘yicha tanlab olingan drayver loyihalarni sifatli amalga oshirish, tadbirkorlar uchun yaratilgan imkoniyatlar va taqdim etilgan soliq imtiyozlaridan samarali foydalangan holda yangi ish o‘rinlari yaratadigan loyihalarni jadal hayotga tatbiq etish zarurligi alohida ta’kidlandi.