Ўзбекистон Республикаси Ички ишлар вазирлиги

Жорий йилнинг 1-30 ноябрь кунлари республика миқёсида ўтказилаётган “Кибермаданиятни юксалтириш ойлиги” комплекс тарғибот тадбирлари муносабати билан вилоят Журналистлар уйида оммавий ахборот воситалари, журналист ва блогерлар учун Матбуот анжумани бўлиб ўтди.

Матбуот анжуманида вилоят Ички ишлар бошқармаси бошлиғи, бошқарма Ахборот технологиялари соҳасидаги жиноятларга қарши курашиш бошқармаси ходимлари, корхона ва ташкилотлар ахборот хизматлари раҳбарлари, банкирлар, журналист ва блогерлар иштирок этди.

Тадбирда вилоят Ички ишлар бошқармаси бошлиғи, полковник Абдувохид Исмоилов сўз олиб, ривожланиб бораётган ахборот асрида, ҳаётимизнинг барча жабҳаларида компьютер ва рақамли технологиялар муҳим аҳамият касб этаётганини билдирди.

Шу сабабли Ўзбекистон Республикаси Президентининг 2025 йил 30 апрелдаги “Ахборот технологиялари ёрдамида содир этиладиган жиноятларга қарши курашиш фаолиятини янада кучайтиришга қаратилган чора-тадбирлар тўғрисида”ги қарорига мувофиқ, республика миқёсида ҳар йилнинг ноябрь ойида «Кибермаданиятни юксалтириш ойлиги» ўтказилиши белгиланган.

Қарор асосида Вазирлар Маҳкамасининг 2025 йил 29 сентябрдаги дастури ҳамда Қашқадарё вилоят ҳокимининг 2025 йил 1 ноябрдаги фармойиши қабул қилиниб, барча давлат органлари ва ташкилотларига, турли соҳа ва йўналишларга аниқ вазифалар юклатилди.

Вилоят ички ишлар бошқармаси Ахборот технологиялари соҳасидаги жиноятларга қарши курашиш бошқармаси «Кибермаданиятни юксалтириш ойлиги» комплекс профилактик тарғибот тадбирлари доирасида барча корхона ва ташкилотлар, маҳаллалар, таълим даргоҳларида ҳамкорликда тарғибот ишларини амалга ошириб, амалий-услубий тадбирларни кенг миқёсда ўтказиб келмоқда.

Кибержиноятларни олдини олиш ҳамда аҳолини кибероламдаги таҳдидлар, жиноятлардан ҳимоялаш ва иммунитетини оширишга барча ўз ҳиссасини қўшса бу турдаги жиноятларни олди олиниши шубҳасизлиги таъкидланди.

Якунда иштирокчиларнинг саволларига атрофлича жавоблар берилди.

Қашқадарё вилояти ИИБ Ахборот хизмати