Бухоро вилояти ҳокими раҳбарлигида жиноятчилик ҳолати ва ҳуқуқбузарликларнинг олдини олиш масалалари юзасидан таҳлилий-танқидий йиғилиш бўлиб ўтди
2025-11-04 11:40:00 / Янгиликлар
Йиғилишда вилоят ҳокимининг ўринбосарлари, туман ва шаҳар ҳокимлари, ҳуқуқни муҳофаза қилувчи органлар, давлат идоралари, тегишли бошқармалар раҳбарлари ҳамда «маҳалла еттилиги» вакиллари иштирок этди.
Дастлаб, Ўзбекистон Республикаси Президентининг 2025 йил 3 январдаги ПҚ–1-сонли қарори ижроси доирасида ҳудудларда амалга оширилган ишлар юзасидан маълумотлар тингланди.
Шунингдек, вилоят ҳудудида содир этилган оғир ва ўта оғир турдаги жиноятлар таҳлил қилиниб, уларнинг сабаблари ҳамда уларни келтириб чиқарган омиллар атрофлича ўрганилди.
Йиғилишда сўзга чиққан, Бухоро вилояти ички ишлар бошқармаси бошлиғи ўз маърузасида 2025 йилнинг 10 ойи давомида жиноятчилик ҳолати, жиноятларнинг хавфлилик даражаси ҳамда уларнинг олдини олиш бўйича амалга оширилган ишлар ҳақида батафсил ахборот берди.
Ҳисобот даврида вилоятда ўтган йилга нисбатан оғир ва ўта оғир жиноятлар сони камайганлиги, 312 та (60 фоиз) маҳаллаларда умуман жиноят содир этилмаганлиги, яна 174 та (34 фоиз) маҳаллаларда жиноятлар сони камайганлиги таъкидланди.
Йиғилишда, айниқса, аёллар ва ёшлар ўртасидаги жиноятчилик, вояга етмаганлар иштирокидаги ҳуқуқбузарликлар ҳамда гиёҳвандлик воситалари билан боғлиқ ҳолатлар бўйича танқидий таҳлиллар ўтказилди. Айрим туман ва шаҳар раҳбарларининг бу борадаги сусткашлиги, масалага фақат ҳисобот учун ёндашаётганлиги кескин танқид қилинди.
Вилоят ҳокими Ботир Зарипов ёшлар билан тизимли ишлаш, «маҳалла еттилиги» фаолиятини кучайтириш, жамоат хавфсизлигини таъминлашда масъуллар ўртасида аниқ ҳамкорликни йўлга қўйиш зарурлигини қайд этди. Шунингдек, жиноят содир этган фуқароларнинг ижтимоий реабилитацияси, уларни жамиятга қайта мослаштириш, иш билан таъминлаш ва руҳий қўллаб-қувватлаш масалаларига алоҳида эътибор қаратиш лозимлигини таъкидлади.
Танқидий-таҳлилий руҳда ўтган йиғилиш якунида, масъулларга жиноятчиликни камайтириш, ижтимоий профилактика тизимини кучайтириш, аёллар ва ёшлар ўртасидаги ҳуқуқбузарликларнинг олдини олиш бўйича аниқ топшириқлар берилди ҳамда уларнинг ижроси қатъий назоратга олинди.
Бухоро вилояти ИИБ Ахборот хизмати