Ички ишлар органлари ходимларининг саломатлиги – хизмат самарадорлигининг кафолатидир. Бухоро вилояти ИИБ Тиббиёт бўлими қошидаги госпиталь капитал таъмирланиб фойдаланишга топширилди
2025-10-24 12:00:00 / Янгиликлар
Саломатлик ҳар биримизнинг улкан бойлигимиз. Хизмат фаолияти мураккаб соҳалардан бири ҳисобланган ички ишлар органлари ходимларини саломатлигини назорат қилиб бориш, уларнинг соғлиқларидаги муаммоларга тўғри ташхис қўйиш ва муолажа қилиш мақсадида ҳудудий ички ишлар органларининг тиббиёт бўлими мутахассис шифокорлари ҳар бир ҳудудда фаолият олиб боришмоқда.
Ўзбекистон Республикаси Ички ишлар вазири Бухорога ташрифи доирасида капитал таъмирдан сўнг қайта фойдаланишга топширилган вилоят Ички ишлар бошқармаси Тиббиёт бўлими қошидаги госпиталнинг очилиш тадбирида иштирок етди. Тадбирда вилоят ҳокими, ички ишлар органлари ва соғлиқни сақлаш тизими ходимлари ҳамда соҳа фахрийлари қатнашиб, сўнги йилларда Давлатимиз раҳбари томонидан фуқаролар саломатлиги ва хавфсизлигини таъминлаш борасида олиб борилган чуқур ислоҳотларнинг бугунги самаралари ҳақида эътироф этдилар.
Мазкур тиббиёт маскани дастлаб 1978-йилда ташкил этилган бўлиб, капитал таъмирлаш ишлари натижасида бинонинг қиёфаси, энергетика тизимлари, шунингдек, лаборатория, физиотерапия, ошхона, овқатланиш заллари ва дам олиш масканлари тўлиқ янгиланди.
Таъмирдан сўнг госпиталнинг сиғими 80 ўриндан 100 ўринга оширилди. Муассаса замонавий тиббий ускуналар билан тўлиқ жиҳозланди, эндиликда ушбу масканда 50 ўринли терапия, 40 ўринли неврология ва 10 ўринли психосоматик бўлимлар фаолият юритади.
Тадбир иштирокчилари янги госпиталда яратилган шароитлар, тиббий хизмат сифати ва иш самарадорлигини ошириш чоралари билан танишиш чоғида, масъуллар билан ходимларнинг соғлиғини муҳофаза қилиш, малакали тиббий ёрдам кўрсатиш ва реабилитация хизматларини кенгайтириш масалаларини муҳокама қилдилар.
Тадбир сўнгида, Бухоро вилояти ИИБ Тиббиёт бўлими госпитали бошлиғи, лейтенант Ҳафизова Парвина Нормуродовна хизматга масъулият билан ёндашганлиги, ташаббускорлиги, тиббий фаолиятни тўғри ташкил этганлиги ва ходимлар учун муносиб шарт-шароит яратганлиги учун Ички ишлар вазирининг буйруғи билан навбатдан ташқари катта лейтенант махсус унвони билан тақдирланди.