Жорий йилда республикамиз ҳудудидаги жами 2 минг 76 та масжидларда ҳайит намозлари ўқилади
2024-04-09 13:00:00 / Янгиликлар
Бу ҳақда АОКАда ўтказилган брифингда Ички ишлар вазирлиги Жамоат хавфсизлиги департаменти ахборот хизмати раҳбари Музифа Султонова маълум қилди.
Масжидлар ва уларнинг атроф ҳудудларида фуқароларнинг хавфсизлиги таъминланиб, жамоат тартибининг бузилиши ҳамда фавқулодда ҳолатлар содир этилишига йўл қўйилмаслиги тўлиқ назоратга олинган.
Намоз ўқиладиган масжидларда жамоат тартибини сақлаш ва фуқаролар хавфсизлигини таъминлашга жами 12 минг 374 нафар ички ишлар органлари, 2 минг 771 нафар Миллий гвардия ва 2 минг 622 нафар Фавқулодда вазиятлар вазирлиги ходимлари ва ҳарбий хизматчилари жалб этилган.
Уларга хизматда фойдаланиш учун 7 минг 352 та алоқа ва 2 минг 433 та автотранспорт воситалари, 4 минг 845 та металлодетектор бириктирилди ҳамда 372 та хизмат итлари ажратилди. Шунингдек, республикадаги барча ЙПХ масканларининг иш фаолияти кучайтирилган тартибга ўтказилди.
Бевосита автомобиль йўлларига ёндош жойлашган масжидлар атрофидаги йўлларда транспорт воситаларининг ҳаракатини вақтинчалик чеклаш чоралари кўрилиб, фуқаролар ҳаёти ва саломатлигига зарар етказиши мумкин бўлган ҳаракатларни содир этилишининг олдини олиш мақсадида, масжидларга кириш жойларда бетон ёки металл тўсиқлар ўрнатилган ҳолда, масжидлардан 150 метр узоқликда алоҳида автотураргоҳлар ташкил этилган.
Бу борада юртдошларимиз ва республикамиз меҳмонларидан йўл-патруль хизмати ходимлари кўрсатган йўналишларда ҳаракатланишларини ва ҳайит намозидан сўнг ушбу ҳудудларда ҳаракат чекланганлиги сабабли, тартиб билан тарқалишларини сўраб қоламиз.
Бугунги кунда республикамиз ҳудудида 100 дан ортиқ объектларда, булар бозорлар, йирик савдо ва кўнгилочар дам олиш мажмуалари ҳамда фуқаролар гавжум бўладиган бошқа жойларда жамоат тартибини сақлаш ва жамоат хавфсизлигини таъминлаш мақсадида тақсимотга асосан
1000 нафардан ортиқ ИИВ ва МГнинг ҳудудий бўлинмалари шахсий таркиби, шунингдек кинолог ходимлар 100 дан ортиқ хизмат итлари билан хизматга жалб этилган. Қолаверса, мажмуаларда ўрнатилган барча видео-кузатув камералари ички ишлар органларининг ситуацион марказларига интеграция қилиниб, туну кун назорат қилинмоқда.
Асосий эътибор ушбу жойларда фуқароларнинг тинчлиги ва осойишталигини таъминлаш, жиноят ва ҳуқуқбузарликларни олдини олиш ҳамда турли хил кўнгилсиз ва фавқулодда ҳодисаларнинг содир этилишига йўл қўймасликка қаратилган.