Сурхондарё вилояти ИИБда «Энг яхши эксперт-криминалист» кўрик-танловининг вилоят босқичи бўлиб ўтди
2025-08-27 11:35:00 / Янгиликлар
Ўзбекистон Республикаси Президентининг 2022 йил 8 февраль кунидаги «Ички ишлар органларининг эксперт-криминалистика фаолиятини замонавий илм-фан ютуқларини кенг жорий этган ҳолда янада такомиллаштириш чора-тадбирлари тўғрисида»ги ПҚ-122 сон қарори ҳамда Ўзбекистон Республикаси ИИВнинг 2022 йил 27 апрель кунидаги «Ички ишлар органлари тизимида «Энг намунали эксперт-криминалистика жамоаси» ва «Энг яхши эксперт-криминалист» кўрик-танловларини ўтказиш тўғрисида»ги тегишли буйруқлари талаблари асосида жорий йилининг 19 август куни, Сурхондарё вилояти Ички ишлар бошқармасида вилоят ИИБ ҳамда шаҳар-туман ИИБ Эксперт-криминалистика ходимлари ўртасида «Энг яхши эксперт-криминалист» кўрик-танловининг вилоят босқичи ўтказилди.
Ушбу ўтказилган кўрик танлов учта шарт асосида ташкил этилиб, унда эксперт-криминалист ходимларининг интеллектуал салоҳияти, жисмоний ва жанговар тайёргарлиги ҳамда хизматга оид меъёрий ҳужжатларнинг юритилиши бўйича якка тартибдаги суҳбатлар асосида ўтказилди.
Кўрик танлов иштирокчилари ўзларининг соҳага оид билимлари, хизматга оид тажриба ва малакавий кўникмалари тест асосида синалди. Иккинчи шартга кўра АКМ автоматидан ва ПМ пистолетларининг тўлиқсиз қисмларга ажратиш ва йиғишга доир малакаларини намойиш қилишди. Шундан сўнг комиссия аъзолари иштирокида экспертларнинг соҳага доир махсус ва касбий билимларига қай даражада эга эканликлари, фаолияти давомида эришган ютуқлари ҳамда хизматга оид меъёрий ҳужжатларнинг юритилиши бўйича якка тартибда суҳбатлар ўтказилди.
Кўрик танлов натижаларига кўра, Термиз шаҳар ИИБ Эксперт-криминалистика гуруҳи катта эксперти катта лейтенант Ислом Норбеков биринчи ўринга, Денов тумани ИИБ Эксперт-криминалистика гуруҳи катта эксперти Олим Ваҳобов иккинчи ўринга, вилоят ИИБ Эксперт-криминалистика маркази катта эксперти капитан Садриддин Чориев учинчи ўринни эгаллаб, мазкур учлик республика миқёсида ўтказиладиган «Энг намунали эксперт криминалистика жамоаси» кўрик-танловида қатнашиш йўлланмасини қўлга киритди. Кўрик танлов ғолиблари муносиб равишда тақдирланишди.
Сурхондарё вилояти ИИБ Ахборот хизмати