Ўзбекистон Интерпол Миллий Марказий Бюроси халқаро қидирувда бўлган жиноятчини Таиланд Қироллигидан чиқариб юборилишига эришди
2025-08-18 14:30:00 / Янгиликлар
Интерпол Тошкент ва Бангкок Миллий марказий бюроларининг ҳамкорликдаги саъй-ҳаракатлари натижасида Интерпол каналлари орқали халқаро миқёсда қидирув эълон қилинган жиноятчини депортация қилиш масаласи ҳал этилди.
Пойтахтдаги Ислом Каримов номидаги Халқаро аэропорт ҳудудида Миллий марказий бюро ходимлари томонидан Таиланд Қироллигидан депортация қилинган Ўзбекистон фуқароси Х.К. ушланди. У Ўзбекистон ҳуқуқни муҳофаза қилиш органлари ташаббуси билан ўта йирик миқдордаги фирибгарликда айбланиб, халқаро қидирувда бўлган. Ушбу ҳолат юзасидан жиноят иши қўзғатилган, айбланувчи чет элга қочиб, терговдан яширинган ва халқаро қидирувга эълон қилинган.
Интерпол каналлари орқали Таиланд ҳуқуқни муҳофаза қилиш органлари билан мувофиқлаштирилган ҳамкорлик ҳаракатлари натижасида, қидирувдаги шахс Таиланд ҳудудида ушланди ва кейинги тергов тадбирларини ўтказиш учун Ўзбекистон Республикасига депортация қилинди.
Ўзбекистон Республикасидаги Интерпол Миллий марказий бюроси