Фуқароларнинг мурожаати ИИВ раҳбарияти томонидан назоратга олинди
2025-07-27 09:00:00 / Янгиликлар
Тошкент шаҳри «Бешёғоч» кўчасидаги «Бўрижар» каналига чўмилиш учун келаётган фуқаролар томонидан содир этилаётган турли хил тартибсизликларга қарши чора кўрилиши юзасидан ҳудуд аҳолисининг мурожаати ижтимоий тармоқда ёритилиб, турли муҳокамаларга сабаб бўлган.
Мазкур мурожаат ИИВ Жамоат хавфсизлиги департаменти назоратига олиниб, муаммони ўз ўрнида ўрганиш ва бартараф этиш чоралари кўрилди.
Хусусан, Ички ишлар вазири ўринбосари, генерал майор Бекмурод Абдуллаев Чилонзор тумани «Бешёғоч» маҳалласида бўлиб, «Бўрижар» канали атрофини кўздан кечирди ҳамда ҳудуд аҳолиси билан яқиндан суҳбатлашди.
Жараёнда вазир ўринбосари фуқаролар томонидан таъкидланган ечим талаб масалаларни ижобий ҳал этиш бўйича «Маҳалла еттилиги» вакиллари ҳамда тегишли мутасадди идора масъулларга кўрсатма ва тавсиялар берди.
Чилонзор тумани ИИБ ЖХХ Патруль-пост хизмати, Йўл-патруль хизмати ходимлари ҳамда профилактика инспекторлари иштирокида «Бўрижар» канали атрофида рейд тадбири ўтказилиб, ушбу ҳудудда олиб борилган профилактик чора-тадбирларга қарамасдан, айрим фуқаролар томонидан ҳуқуқбузарликлар содир этилаётганлиги аниқланди.
«Чўмилиш тақиқланади» белгилари ўрнатилганлигига қарамасдан, чўмилиш учун келган ҳамда атрофга ҳар хил чиқиндилар қолдириб кетаётган фуқаролар билан профилактик тушунтириш ишлари олиб борилиб, 25 нафар шахсларга нисбатан маъмурий баённома расмийлаштирилди.
Шунингдек, тўхташ қоидаларини бузиб, белгиланмаган жойларда транспорт воситаларини қолдириб кетаётган ҳайдовчилар маъмурий жавобгарликка тортилди.
Канал атрофи Тошкент шаҳар экология ва атроф муҳитни муҳофаза қилиш бошқармаси ҳамда туман ободонлаштириш бошқармаси ходимлари томонидан чиқиндилардан тозаланиб, жамоат тартибини сақлаш ва фуқаролар осойишталигини таъминлаш бўйича зарур чоралар кўрилди.
ИИВ Жамоат хавфсизлиги департаменти Ахборот хизмати