Ўзбекистон ва Полша Интерпол ходимларининг ҳамкорликдаги саъй-ҳаракатлари туфайли йирик миқдордаги фирибгарлик учун қидирувда бўлган жиноятчи ушланди ва экстрадиция қилинди
2025-06-29 01:05:00 / Янгиликлар
Интерполнинг Ўзбекистон Республикасидаги Миллий марказий бюроси ходимлари томонидан фирибгарлик жиноятини содир этганлиги учун халқаро қидирувда бўлган жиноятчини экстрадиция қилиш жараёни амалга оширилди.
Интерполнинг Тошкент ва Варшава Миллий марказий бюроларининг ўзаро ҳамжиҳатликдаги ҳамкорлиги туфайли Полшада Интерполнинг Қизил хабарномаси фигуранти сифатида ҳибсга олинган, ҳуқуқни муҳофаза қилувчи органларимиз томонидан фирибгарлик учун қидирилаётган жиноятчи Ўзбекистон Республикасига топширилди.
Олинган маълумотларга кўра, жиноятчи Европа Иттифоқи мамлакатлари ҳудудида яширинган, шу сабабли тезкор-қидирув тадбирлари давомида у Полша ҳудудида аниқланган ва қўлга олинган.
Тошкент ва Варшава Интерпол ММБнинг биргаликдаги ҳаракатлари натижасида қидирувдаги шахс аниқланиб, қўлга олинган.
Ўзбекистон Республикаси Бош прокуратурасининг экстрадиция қилиш тўғрисидаги илтимосномаси қаноатлантирилгандан сўнг, Интерпол ходимлари ҳамроҳлигида ва Ўзбекистон Республикасининг Полша Республикасидаги дипломатик ваколатхонаси вакиллари кўмагида жиноятчи суд олдида жавоб бериш учун Ўзбекистонга олиб келинди.
Ўзбекистон Республикасидаги Интерполнинг Миллий марказий бюроси