Ўзбекистон Республикаси ИИВ делегацияси Қозоғистон Республика Остона шаҳрида МДҲ давлатлари ИИВ тезкор хизматлари раҳбарларининг йиғилишида иштирок этди
2025-06-17 19:00:00 / Янгиликлар
Остона шаҳрида Мустақил Давлатлар Ҳамдўстлигига аъзо давлатлар ички ишлар вазирликлари тезкор хизматлари раҳбарларининг уюшган жиноятчиликка қарши курашиш масалаларига бағишланган йиғилиши ўтказилди.
Тадбирда Озарбайжон, Арманистон, Беларус, Қозоғистон, Қирғизистон, Россия, Тожикистон, Ўзбекистон Республикалари ички ишлар вазирликлари делегациялари, шунингдек МДҲга аъзо давлатлар ҳудудида уюшган жиноятчилик ва бошқа хавфли жиноят турларига қарши курашни мувофиқлаштириш бюроси вакиллари иштирок этдилар.
Ўзбекистон Республикаси делегациясига Ички ишлар вазирининг биринчи ўринбосари, полковник Аюбхон Рахматуллаев раҳбарлик қилди.
Йиғилишда Уюшган жиноятчилик ва бошқа хавфли жиноятларга қарши курашни мувофиқлаштириш Бюроси директори, полиция генерал-лейтенанти Олег Коновалов ва МДҲ давлатлари ички ишлар вазирликлари вакиллари маъруза қилдилар.
Учрашувда қурол-яроғ, гиёҳванд ва психотроп моддаларнинг ноқонуний айланишига, жумладан Интернет тармоғи орқали қарши курашиш, шунингдек экстремизм ва кибержиноятчиликка қарши кураш ҳамда халқаро тезкор ахборот алмашинувини кучайтириш чоралари муҳокама қилинди.
Учрашув конструктив ва ишчан руҳда ўтди, иштирокчилар трансмиллий жиноятчиликка қарши курашда ўзаро ҳамкорликни янада мустаҳкамлаш ва тажриба алмашишдан манфаатдор эканликларини билдирдилар.
ИИВ Ахборот хизмати