Интерпол каналлари орқали олиб борилган ҳамкорлик натижасида Ўзбекистон Интерпол Миллий марказий бюроси ходимлари томонидан ўта йирик миқдордаги фирибгарликда айбланаётган фуқаро қўлга олинди
2025-06-13 09:33:00 / Янгиликлар
Ўзбекистон Интерпол Миллий марказий бюроси орқали Бирлашган Араб Амирликларида қидирувдаги шахс аниқланди ва ватанига қайтарилди.
Пойтахтдаги Ислом Каримов номидаги Халқаро аэропорт ҳудудида Миллий марказий бюро ходимлари томонидан Бирлашган Араб Амирликларидан депортация қилинган Ўзбекистон фуқароси ушланди. У Ўзбекистон ҳуқуқни муҳофаза қилиш органлари ташаббуси билан ўта йирик миқдордаги фирибгарликда айбланиб, халқаро қидирувда бўлган. Ушбу ҳолат юзасидан жиноят иши қўзғатилган, айбланувчи чет элга қочиб, терговдан яширинган ва халқаро қидирувга эълон қилинган.
Интерпол каналлари орқали БАА ҳуқуқни муҳофаза қилиш органлари билан мувофиқлаштирилган ҳамкорлик ҳаракатлари натижасида, қидирувдаги шахс Бирлашган Араб Амирликлари ҳудудида ушланди ва кейинги тергов тадбирларини ўтказиш учун Ўзбекистон Республикасига чиқариб юборилди.
Ўзбекистон Республикасидаги Интерпол Миллий марказий бюроси