Ўзбекистон Республикаси Ички ишлар вазирлиги

Андижон вилояти республикадаги энг чекка ҳудудлардан ҳисоблансада, бу ерга дунёнинг кўплаб мамлакатлари фуқаролари келиб кетади. Масалан, жорий йилнинг 5 ойи давомида 12485 нафар хориж фуқароси яшаш учун вақтинча рўйхатга қўйилди.

Улар орасида дунёнинг 50 та давлатидан келган вакиллар бор. Энг кўп ён ва жон қўшни Қирғиз Республикаси фуқаролари бўлса, ундан кейинги ўринларни Туркия, Хитой, Тожикистон, Қозоғистон, Туркманистон ва АҚШдан келган шахслар ташкил этади. Рўйхатдан Испания, Германия, Буюк Британия каби бир қатор Европа мамлакатлари ҳамда Баҳрайн, Жазоир, Марокаш, Миср каби Осиё давлатларидан ташриф буюрган меҳмонлар ҳам ўрин олган.

Улар асосан иш, бизнес, саёҳат, оилавий алоқалар ва меҳмондорчилик мақсадларида қадам ранжида қилган. Вилоятда Ҳиндистон ва Покистондан келиб, таълим олаётган 1000 нафар талаба ҳам вақтинчалик рўйхатда туради.

Вилоят ИИБ Миграция ва фуқароликни расмийлаштириш бошқармаси муҳим топшириқлар бўйича инспектори, капитан Жаҳонгир Муллаев берган маълумотларга қараганда, бугун мамлакатимизда чет давлатлар билан йўлга қўйилган кенг қамровли ҳамкорлик ортидан хорижликларнинг юртимизга келиб, вақтинча яшаш имкониятлари кенгайди.

Масалан, Қозоғистон фуқароларининг Ўзбекистонда вақтинча рўйхатда туриш муддати бир ойга узайтирилди.

Вилоятда фуқаролиги бўлмаган шахс (ФБШ)ларни фуқароликка қабул қилиш жараёнлари осонлашди. 2016 йилдан шу кунга қадар 3 мингга яқин фуқаролиги бўлмаган шахс Президентнинг тегишли фармонлари асосида фуқароликка қабул қилинган бўлса, 2022 йилдан бошлаб мингдан ортиқ шахсларнинг фуқаролиги тан олинди.

Бу эса кўрсатилаёт-ган бағрикенглик сиёсати натижасида ФБШ ҳужжатига эга бўлган фуқаролар деярли қолмаганини, бундай мақомдаги шахслар юртимизнинг тўлақонли фуқароларига айланганлигини билдиради.

Бугун миграция хизматлари ва фуқароликни расмийлаштириш жараёнлари мутлақ янгича дастур асосида фаолият кўрсатмоқда. Хизматлар онлайн тизим орқали амалга оширилаётгани учун мурожаатларнинг ҳал этилиш даври жадаллашди.

Аввалгидек навбат кутишлар йўқ. Ҳудудийлик тамойилнинг жорий этилиши фуқароларга керакли хизматлардан фойдаланиш учун ўзига қулай миграция бўлимларига мурожаат қилиш имконини берди. Тўловлар ҳам биллинг тизими орқали, ходимларнинг аралашувисиз амалга оширилмоқда.

Хулоса шуки, юртимизга келаётган хорижий меҳмонлар ва юртдошларимизнинг биздан рози бўлишлари учун барча шароит муҳайё.

©️ «Постда» газетаси, Нигорахон Тўхтаматова, Андижон вилояти.