Ички ишлар вазирлигида “Ўзбек тилининг давлат тили сифатидаги нуфузини ошириш – муҳим вазифа” мавзусида навбатдаги маънавият ва маърифат дарси бўлиб ўтди
2024-02-05 18:00:00 / Янгиликлар
ИИВ Марказий аппарати ходимлари иштирок этган тадбирни Маънавий-маърифий ишлар хизмати бошлиғи, полковник Ҳамза Махсумов очиб, сўнгги йилларда барча соҳалар қатори, ички ишлар органлари тизимида ҳам ўзбек тилининг нуфузини оширишга қаратилган ишлар изчил амалга оширилаётганини таъкидлади., шунингдек, тадбирда давлат тили тўғрисидаги қонун ҳужжатларига риоя этиш ва уларнинг ижросини таъминлаш вазирлик раҳбарияти томонидан назоратга олингани, бу борада қатор ҳуқуқий ҳужжатлар қабул қилинганини қайд этилди.
Шундан сўнг сўзга чиққан Вазирлар Маҳкамаси ҳузуридаги Ўзбек тилини ривожлантириш жамғармаси директори Азизжон Эминов ҳамда Давлат тилида иш юритиш асосларини ўқитиш ва малака ошириш маркази директори, филология фанлари номзоди, доцент Иномжон Азимов бугунги кунда она тилимизнинг обрўсини янада кўтариш давлатимиз олдида турган муҳим масалалардан бири экани, бунинг учун етарлича саъй-ҳаракатлар амалга оширилаётганига батафсил тўхталди.
Ҳозирда дунёнинг кўплаб давлатларида ўзбек тили ўрганилаётгани, эндиликда уларнинг сонини янада ошириш мақсадида иш олиб борилаётганини тилга олишди.
Тадбир доирасида она тилимиз ҳақидаги видеоролик намойиш этилиб, иштирокчиларнинг мавзу юзасидан берган саволларига соҳа мутахассислар атрофлича жавоб қайтаришди.