Президентнинг 2025 йил 3 январдаги ПҚ-1-сон қарори ижроси бўйича Сурхондарё вилояти масъулларининг ўрганишлари Олтинсой туманида давом этди
2025-03-24 21:00:00 / Янгиликлар
Аввал хабар берганимиздек, Сурхондарё вилояти прокуратураси ҳамда вилоят Ички ишлар бошқармаси томонидан Президентимизнинг 2025 йил 3 январь кунидаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги ПҚ-1-сон қарори ижроси юзасидан ўрганишлар олиб борилмоқда. Ўрганишларнинг кейинги манзили Олтинсой туманида давом эттирилди.
Хусусан, ишчи гуруҳ тумандаги криминоген вазияти оғир бўлган “Чеп” маҳалласида бўлиб, маҳалла еттилиги, “Обод маҳалла”, “Обод хонадон” дастури ижроси, “Бўстон” маҳалласида Ҳуқуқ-тартибот маскани фаолияти ҳамда Президент қарори ижроси доирасида амалга оширилаётган ишлар билан танишиб, масъулларга бу борадаги ишларни жадаллаштириш ҳамда аниқланган камчилликларни бартараф этиш юзасидан тегишли топшириқлар берилди.
Шунингдек, туман прокуратурасида ташкил этилган туман мувофиқлаштирувчи штаб ва ишчи гуруҳ аъзолари томонидан Қарор ижроси юзасидан амалга оширилган ишлари муҳокама қилиниб, туман “Йўл харита”да белгилаб берилган вазифалар ижросини ўз вақтида сифатли ижро этилишини таъминлаш ҳамда амалга оширилаётган ишлар ҳаққонийлигини кунлик назорат тартибида ўрганиб борилиши лозимлиги таъкидланди.
Бундан ташқари, Давлатимиз раҳбари раислигида Коррупцияга қарши курашиш йўналишида ўтказилган йиғилишда берилган топшириқлар ижроси ва йўл қўйилган камчиликлар танқидий муҳокама қилиниб, келгусидаги вазифалар белгилаб олинди.
Бу борадаги амалий ишлар вилоятнинг бошқа ҳудудларида ҳам давом эттирилмоқда.
Сурхондарё вилояти ИИБ Ахборот хизмати