Фарғона вилояти ИИБ ҳамда ҳуқуқ-тартибот идоралари билан ҳамкорликда вилоятда “Тозалаш” комплекс тезкор-профилактик тадбирлари давом эттирилмоқда
2025-02-11 18:00:00 / Янгиликлар
“2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги Ўзбекистон Республикаси Президентининг ПҚ-1-сон қарори ижросини таъминлаш мақсадида Ички ишлар вазирининг 47-сон Фармойиши ишлаб чиқилди. Мазкур фармойиш асосида ИИВ ишчи гуруҳи томонидан Фарғона вилояти ИИБ ҳамда ҳуқуқ-тартибот идоралари билан ҳамкорликда Фарғона вилоятида “Тозалаш” комплекс тезкор-профилактик тадбирлари давом эттирилмоқда.
Тадбирлар аввалида ташкил этилган йўриқномаларда ҳар бир ходимга фуқаролар билан хушмуомалада бўлиш, хизмат интизоми ва қонунчиликка қатъий риоя қилиш борасида тегишли кўрсатмалар берилди. Жамоат тартибини сақлаш, ҳуқуқбузарликлар профилактикаси ҳамда йўл ҳаракати хавфсизлигини таъминлаш йўналишларида рейд тадбирлари ташкил этилиб, 8 нафар ов қуролини ҳужжатсиз ноқонуний сақлаб келаётган, 27 нафар жамоат жойида тиғли буюм олиб юрган шахсларга нисбатан жиноий ва маъмурий чоралар кўрилди. Авторейд тадбирларида 1321 нафар қоидабузар ҳайдовчилар аниқланиб, 131 та транспорт воситалари жарима майдончасига жойлаштирилди.
Шунингдек, “Тозалаш” комплекс тезкор-профилактик тадбирлари доирасида Фарғона шаҳрида ўтказилган тезкор тадбир давомида 1986 ҳамда 1988 йилда туғилган икки нафар шахс қўлга олинди. Улар ўзаро жиноий тил бириктириб, товламачилик йўли билан 1987 йилдан туғилган фуқаронинг сир сақланиши лозим бўлган шахсга доир маълумотларни рухсатсиз қўлга киритиб, тарқатиш билан қўрқитиб келган. Шу мақсадда ундан 2 минг 500 АҚШ доллари талаб қилиб, олдиндан 1 минг 500 АҚШ долларини олган вақтида ашёвий далиллар билан ушланди.
Бувайда туманида ҳуқуқни муҳофаза қилиш органлари билан ҳамкорликда ўтказилган тезкор тадбирда эса 1991 йилда туғилган шахс 2022 йилда диний таълимотдан сабоқ бериш тартибини бузганлиги учун судланган бўлишига қарамасдан 1996 йилда туғилган турмуш ўртоғи билан биргаликда яшаш хонадонининг ертўла қисмида 30 нафар шахсларга ҳужра шароитида диний сабоқ бериб келганлиги аниқланди. Ертўлада таълим олаётганларнинг 23 нафари вояга етмаганлар бўлиб, улар орасида нафақат Фарғона вилояти Сирдарё, Наманган, Сурхондарё вилоятларидан ота-оналари томонидан олиб келинганлари ҳам бор.
“Кўмир таъминот” МЧЖ Фарғона вилояти филиали Сўх кўмир омбори 2024 йил давомида 10,7 тонна арзонлаштирилган кўмир маҳсулотларини етказиб берган. Предметларни ва ҳужжатларни текшириш тезкор тадбири давомида Сўх кўмир омбори мудири ва мансабдор шахслари томонидан юк хати ҳужжатларини сохталаштириш орқали чиқим ҳужжатларига нисбатан 10,7 тонна кўмир маҳсулотларидан 8,7 минг тоннасини ўрнатилган тартибда аҳоли ҳамда ижтимоий соҳа объектлари эҳтиёжлари учун етказиб берилиб, 2 минг тонна қиймати 780 млн сўмлик “БР” маркали кўмир маҳсулотлари чиқим ҳужжатларига қўшиб ёзиш орқали ўзлаштириб, талон-торож қилинганлиги аниқланди.
“Тозалаш” комплекс тезкор-профилактик тадбирлари Фарғона вилоятининг барча ҳудудларида давом эттирилмоқда.
ИИВ Тезкор қидирув департаменти