Ўзбекистон Республикаси Ички ишлар вазирлиги

Жумладан, жорий йилнинг 12 декабрь куни Ички ишлар вазири генерал-лейтенант Пўлат Бобожонов бошчилигида соҳа масъуллари ҳамда ҳамкор ташкилотларнинг мутасаддилари иштирокида пойтахтимизнинг Шайхонтоҳур ва Яккасарой туманларининг электр тармоқ бўлинмалари қошида тузилган ҳуқуқ-тартибот идоралари, ҳокимлик, коммунал-тезкор хизматлар масъуллари ҳамда иссиқлик энергия корхоналари раҳбарларидан иборат ишчи гуруҳлар томонидан амалга оширилаётган ишларнинг самарадорлиги ўрганилди.

Аҳолини куз-қиш мавсумида энергия таъминоти (электр, табиий ва суюлтирилган газ, иссиқ сув) билан тўлиқ таъминлаш, авариявий ва бошқа нохуш ҳолатларни зудликда бартараф этиш чораларини таъминланганлигини назорат қилиш мақсадида “Иссиқлик электр станциялари” АЖнинг Шайхонтоҳур туманида жойлашган “Tashkent city” ҳудудини электр энергияси билан узлуксиз таъминлаш мақсадида барпо этилаётган 110/35/10 кВА янги подстанцияни ишга топшириш жараёни, туманнинг Оқилон маҳалласида жойлашган туман аҳолисини 468 минг Гкал иссиқлик энергияси билан таъминлайдиган 3-сонли ИЭС фаолияти ҳамда Яккасарой тумани ҳудудида жойлашган “Тошкент шаҳар иссиқлик электр маркази” мутасаддиларининг иши ўрганилди.

Тадбир жараёнида электр таъминоти бўйича амалга оширилган чора-тадбирларга қарамай, айрим маҳаллаларда электр узилишлари ҳалигача муаммо бўлиб қолаётганлиги, бу эса нафақат аҳолининг кундалик турмуш тарзига, балки тадбиркорлик субъектларининг фаолиятига ҳам салбий таъсир кўрсатаётганлиги, табиий газ таъминоти бўйича эса айрим ҳудудларда суюлтирилган газни ўз вақтида етказиб беришда кечиктириш ҳолатлари кузатилаётганлиги таъкидланиб, аниқланган камчиликлар бартараф этиш лозимлиги таъкидланди.

Ҳудудларда коммунал тезкор хизматлар ва фавқулодда вазиятлар хизматининг мураккаб ёки авариявий ҳолатларни зудлик билан бартараф этиш фаолиятига баҳо бериш мақсадида Шайхонтоҳур тумани Гулобод даҳаси “Сарҳумдон” маҳалласи учун “ўқув ташвиш” тадбири эълон қилиниб, масъулларнинг тезкор иш жараёни ўрганилди. Аниқланган камчиликлар бўйича хизмат текширувларини тайинлаб, қисқа муддатларда бартараф этиш вазифаси қўйилди.

Шунингдек маҳаллада асосий эътибор, ҳамкор ташкилотлар билан биргаликда кўп қаватли уйлар, шахсий хонадонлар ва жамоат жойларида видеокузатув қамровини ошириш, криминоген вазиятни чуқур таҳлил қилиш, профилактика инспекторлари томонидан аҳоли муаммоларни ўрганиш ҳамда бартараф этиш бўйича “маҳалла еттилиги” билан яқиндан ҳамкорликни йўлга қўйиш бўйича кўрилаётган чора-тадбирларга қаратилди.

Шунингдек, ишчи гуруҳ томонидан об-ҳавонинг мураккаб шароитларида аҳолига бенуқсон хизмат кўрсатилиши ва хавфсизлик чораларини тўлиқ таъминланиши вазифаларини ўрганиш учун Яккасарой туманида жойлашган “Seoul Mun Tashkent” гастрономик маскани ҳамда “Tashkent city” кўнгилочар боғидаги шароитлар билан танишилди.

Тадбир давомида аниқланган барча камчиликлар танқидий муҳокама қилиниб, келгусида хизмат фаолиятини такомиллаштиришга оид мақсадли чора-тадбирлар белгилаб олинди.

Ишчи гуруҳ аъзоларининг кундалик ўрганиш ишлари мамлакатимизнинг бошқа ҳудудларида ҳам давом этмоқда.