Ўзбекистон Республикаси Ички ишлар вазирлиги

Расмий келишувга мувофиқ БМТ Наркотик ва жиноятларга қарши курашиш бошқармасининг “2023-2025-йиллар давомида Ўзбекистон Республикаси суд-экспертлик муассасаларининг салоҳиятини мустаҳкамлаш – Фаза-III” Дастурига мувофиқ 2024 йилнинг 2-6 декабрь кунлари ички ишлар органлари эксперт-криминалистика бўлинмалари ва бошқа давлат суд экспертиза муассасаларининг экспертлари учун “Қурол ва унинг таркибий қисмларининг баллистик экспертизаси” мавзусида Литва полицияси мутахассислари иштирокида Ички ишлар вазирлиги Эксперт-криминалистика бош марказининг баллистик лабораториясида ўқув курси ташкил этилди.

Ўқув дастурига мувофиқ амалий ўқув машғулотида яроқсиз енгил автотранспортни турли хил ўқотар қуролларидан отиб, автотранспортнинг капот, эшик, ойна ва ўриндиқда ўқдан қолдирилган излар бўйича йўналиши ва масофасини аниқлаш, шунингдек ҳодиса жойини дрон орқали кўздан кечиришнинг ўзига хос усул воситалари бўйича ички ишлар органлари эксперт-криминалистика бўлинмалари ҳамда бошқа давлат суд экспертиза муассасаларининг 18 нафар суд экспертларини баллистика соҳасидаги малакаси оширилади.

Шу муносабат билан, жорий йилнинг 2 декабрь куни “Қурол ва унинг таркибий қисмларининг баллистик экспертизаси” мавзусидаги ўқув курсини очилиш маросимида Ўзбекистон Республикаси Президент Администрацияси ҳузуридаги Наркотикларни назорат қилиш миллий маркази директор ўринбосари – Ш.Каюмов, Тошкентдаги АҚШ элчихонасининг “INL” лойиҳа раҳбари – Нейт Реттенмайер, БМТ Наркотик ва жиноятларга қарши курашиш бошқармасининг минтақавий ваколатхонаси вакили – М.Султанов, ИИВ Эксперт-криминалистика бош маркази бошлиғи – С.Нуриддиновлар иштирок этишди.

Умуман олганда, мазкур ўқув курси ўқотар қурол ноқонуний муомаласи ва қўллаш билан боғлиқ жиноятларни тергов қилиш ва фош этишда халқаро стандартларга мувофиқ ашёвий далиллар бўйича исботлов базасини мустаҳкамлашга хизмат қилади.

Эксперт-криминалистика бош маркази