Ўзбекистон ва Туркия ўртасида жамоат хавфсизлиги соҳасида ҳамкорлик мустаҳкамланмоқда
2026-11-20 11:15:00 / Янгиликлар

Ички ишлар вазирлиги «Хавфсиз шаҳар» тизимларини ривожлантириш маркази ҳамда Туркиянинг «ASELSAN» компанияси вакиллари ўртасида учрашув бўлиб ўтди.
Унда жамоат хавфсизлигини таъминлаш, замонавий технологияларни жорий этиш, рақамли инфратузилмани ривожлантириш ҳамда кузатув қурилмаларининг техник имкониятлари муҳокама қилинди.
Шунингдек, «Хавфсиз шаҳар» платформаси имкониятлари, маҳаллий дастурчилар томонидан ишлаб чиқилган дастурий маҳсулотлар ва сервер инфратузилмаси юзасидан фикр алмашилди.
Мазкур учрашув жамоат хавфсизлиги соҳасида замонавий технологияларни ривожлантириш, илғор тажрибаларни ўрганиш ва халқаро ҳамкорлик алоқаларини мустаҳкамлашга қаратилди.
ИИВ «Хавфсиз шаҳар» тизимларини ривожлантириш маркази


