ИИВ раҳбарияти томонидан Хоразм вилояти Гурлан туманида жамоат хавфсизлигини таъминлаш ҳамда куз-қиш мавсумига тайёргарлик ҳолати ўрганилди
2026-11-19 13:00:00 / Янгиликлар

Ички ишлар вазири ўринбосари, генерал-майор Мирзараҳимов Баходир Юлдошевич раҳбарлигидаги ишчи гуруҳ томонидан Хоразм вилояти Гурлан туманида жамоат хавфсизлигини таъминлаш ҳамда куз-қиш мавсумига тайёргарлик ҳолати юзасидан ўрганиш ишлари олиб борилди.
Ташриф давомида Гурлан туманидаги Боғистон маҳалла фуқаролар йиғинининг хизмат фаолияти, шунингдек, маҳаллада фаолият юритаётган «еттилик» вакилларининг иш самарадорлиги атрофлича ўрганилди.
Жумладан, маҳаллада жиноятчилик ва ҳуқуқбузарликларнинг олдини олиш, фуқароларнинг муаммоларини манзилли ҳал этиш, ижтимоий ҳимояга муҳтож оилалар билан ишлаш, ёшлар ва хотин-қизларнинг бандлигини таъминлаш, шунингдек, аҳоли ўртасида соғлом маънавий муҳитни шакллантириш борасида амалга оширилаётган ишларга алоҳида эътибор қаратилди.
Шу билан бирга, маҳалла ҳудудида жамоат хавфсизлигини таъминлаш, профилактик тадбирларни самарали ташкил этиш, ички ишлар органлари ва маҳалла еттилиги ўртасидаги ҳамкорликни янада кучайтириш масалалари кўриб чиқилди.
Куз-қиш мавсумига тайёргарлик жараёни ҳам эътибордан четда қолмади.
Маҳалла ҳудудида аҳоли хавфсизлигини таъминлаш, мавсумий муаммоларнинг олдини олиш ҳамда масъул ташкилотлар билан ҳамкорликда зарур чора-тадбирларни амалга ошириш юзасидан фикр алмашилди.
Ўрганиш якунида аниқланган камчиликларни бартараф этиш, маҳалла еттилиги фаолиятида натижадорликни ошириш, ҳар бир хонадон ва фуқаро билан манзилли ишлаш, жамоат хавфсизлигини таъминлаш борасида масъулиятни янада кучайтириш юзасидан масъулларга тегишли кўрсатма ва топшириқлар берилди.
Зеро, маҳаллада тинчлик ва осойишталикни таъминлаш, аҳоли муаммоларини ўз вақтида ҳал этиш ҳамда фуқароларнинг розилигига эришиш — барча масъул идоралар вакилларининг устувор вазифасидир.
ИИВ Транспорт ва туризм объектларида хавфсизликни таъминлаш Департаменти Ахборот гуруҳи



