Сурхондарё вилоятида қиш мавсумида аҳолини суюлтирилган газ ва кўмир маҳсулотлари билан барқарор таъминлаш ҳамда хавфсизлик талаблари ўрганилди
2026-11-16 19:45:00 / Янгиликлар

Куни кеча Ўзбекистон Республикаси Ички ишлар вазирлиги ҳузуридаги Жазони ижро этиш департаменти бошлиғининг маънавий-маърифий ишлар бўйича ўринбосари, полковник Абдувохид Имяминов ҳамда Сурхондарё вилояти Ички ишлар бошлиғининг ўринбосари — Жамоат хавфсизлиги хизмати бошлиғи, полковник Жўрабек Авазов томонидан вилоят ҳудудида аҳолини суюлтирилган газ ва кўмир маҳсулотлари билан таъминлашга масъул бўлган омборхоналар, сақлаш ва тарқатиш шохобчалари фаолияти ўрганилди.
Ўрганишлар давомида суюлтирилган газ ва кўмир маҳсулотларини қабул қилиш, сақлаш, ҳисобга олиш, ташиш ҳамда истеъмолчиларга белгиланган тартибда етказиб бериш жараёнларининг ташкил этилганлигига алоҳида эътибор қаратилди.
Жумладан, суюлтирилган газ сақланадиган резервуарлар, газ баллонлари ва уларни сақлаш жойларининг техник ҳолати, газ тўлдириш ва тарқатиш жараёнларида белгиланган хавфсизлик меъёрларига амал қилиниши, газ сизиб чиқишининг олдини олиш чоралари, шунингдек, кўмир омборларининг ҳолати, маҳсулот захиралари, сақлаш шароитлари ва аҳолига ўз вақтида етказиб бериш ишлари кўздан кечирилди.
Шунингдек, объектларда ёнғин ва портлаш хавфсизлиги, меҳнат муҳофазаси, техника хавфсизлиги ҳамда санитария талабларига риоя этилиши, ёнғин ўчириш воситаларининг созлиги, огоҳлантириш тизимлари ва фавқулодда вазиятларда тезкор ҳаракат қилишга тайёрлик даражаси баҳоланди.
Ўрганиш жараёнида масъул раҳбар ва ходимлар билан учрашувлар ўтказилиб, аҳолини ёқилғи-энергетика маҳсулотлари билан таъминлашда хизмат вазифаларини виждонан ва масъулият билан бажариш, мавжуд захираларнинг аниқ ҳисобини юритиш, маҳсулотларнинг талон-торож қилиниши, ноқонуний сарфланиши ва белгиланган тартибни бузиш ҳолатларининг олдини олиш юзасидан тегишли кўрсатма ва топшириқлар берилди.
Айниқса, суюлтирилган газни ташиш, сақлаш ва тарқатишда ёнғин ҳамда портлаш хавфсизлиги қоидаларига қатъий амал қилиш, газ баллонларининг техник созлигини назорат қилиш, улардан фойдаланишда белгиланган талабларни бузмаслик, кўмир маҳсулотларини эса белгиланган меъёрлар асосида сақлаш ва истеъмолчиларга адолатли тақсимлаш зарурлиги таъкидланди.
Масъулларга фавқулодда вазиятлар юзага келганда тезкор ва ҳамжиҳатликда ҳаракат қилиш, ёнғин ўчириш воситалари ҳамда махсус техникаларнинг доимий шайлигини таъминлаш, юк ташиш воситаларининг техник ҳолатини назорат қилиш, шунингдек, аниқланган камчиликларни қисқа муддатларда бартараф этиш бўйича вазифалар белгилаб берилди.
Таъкидланганидек, аҳолининг қиш мавсумида суюлтирилган газ ва кўмир маҳсулотларига бўлган эҳтиёжини ўз вақтида, узлуксиз ва белгиланган тартибда қондириш, фуқароларнинг ҳаёти ва соғлиғини муҳофаза қилиш, ёқилғи маҳсулотларини сақлаш ҳамда етказиб бериш жараёнларида хавфсизликни таъминлаш устувор вазифалардан ҳисобланади.
Асосий мақсад — аҳолини суюлтирилган газ ва кўмир маҳсулотлари билан барқарор таъминлаш, таъминот тизимида қонунийлик ва шаффофликни таъминлаш, ёнғин ва портлаш хавфининг олдини олиш, мавжуд муаммо ва камчиликларни бартараф этиш ҳамда қиш мавсумини фуқаролар учун осойишта ва хавфсиз ўтказишга муносиб ҳисса қўшишдан иборат.
Сурхондарё вилояти ИИБ Ахборот хизмати





