ИИВ раҳбарияти томонидан Навоий вилояти транспортда хавфсизликни таъминлаш бошқармаси ходимларига бир қатор устувор вазифалар белгиланди
2026-11-14 15:30:00 / Янгиликлар
Ўзбекистон Республикаси Ички ишлар вазири ўринбосари, генерал-майор Б.Ю. Мирзарахимов Навоий вилояти Транспортда хавфсизликни таъминлаш бошқармасига ташриф буюриб, бошқарма фаолияти ҳамда ходимлар учун яратилган хизмат шароитлари билан яқиндан танишди.
Ташриф давомида вазир ўринбосари бошқарма шахсий таркиби билан учрашиб, улар билан самимий мулоқот ўтказди. Учрашувда ички ишлар органларида амалга оширилаётган ислоҳотлар, хизмат интизоми ва қонунийликка қатъий риоя қилиш, фуқароларнинг ҳуқуқ ва эркинликларини ҳимоя қилиш, шунингдек, хизмат вазифаларини сидқидилдан бажариш масалаларига алоҳида эътибор қаратилди.
Шундан сўнг, генерал-майор Б.Ю. Мирзарахимов янгиланган Навоий темир йўл вокзалига ташриф буюриб, вокзалда амалга оширилган бунёдкорлик ва ободонлаштириш ишлари, йўловчилар учун яратилган қулайликлар ҳамда транспорт хавфсизлигини таъминлаш борасидаги шарт-шароитлар билан танишди.
Ташриф якунида масъул ходимларга жамоат хавфсизлигини таъминлаш, хизмат фаолияти самарадорлигини янада ошириш, йўловчиларга сифатли хизмат кўрсатиш ҳамда хизмат интизомига қатъий амал қилиш юзасидан тегишли кўрсатма ва тавсиялар берилди.