Наманган вилояти ИИБ раҳбарияти томонидан Янгиқўрғон ва Давлатобод туманлари ИИБ биноларида таъмирлаш ишлари жараёни ўрганилди
2026-11-13 09:00:00 / Янгиликлар
Фуқаролар ва жамоат хавфсизлигини таъминлаш, жиноятчиликнинг олдини олиш ҳамда маҳаллаларда хавфсиз муҳитни шакллантириш йўлида ички ишлар органлари ходимлари томонидан туну кун хизмат олиб борилмоқда.
Бу жараёнда ходимлар учун муносиб хизмат шароитларини яратиш, фуқаролар мурожаатлари билан ишлашда қулайликларни таъминлаш ҳамда бўлимларнинг моддий-техник базасини мустаҳкамлаш муҳим аҳамиятга эга.
Шу мақсадда Наманган вилояти ИИБ бошлиғи қурувчи мутахассислар иштирокида Янгиқўрғон ва Давлатобод туманлари ички ишлар бўлимлари биноларида олиб борилаётган мукаммал таъмирлаш ишларини кўздан кечирди.
Таъмирлаш жараёнининг сифати, белгиланган ишлар кўлами ва муддатларига риоя этилиши, хоналар ҳамда хизмат ҳудудларининг замонавий талабларга мос равишда жиҳозланиши ўрганилди.
Ўрганиш давомида масъулларга қурилиш-таъмирлаш ишларини сифатли ва белгиланган муддатларда якунлаш, меҳнат ва ёнғин хавфсизлиги қоидаларига қатъий риоя этиш, фуқаролар учун қулай қабул ва хизмат кўрсатиш шароитларини яратиш, ходимларнинг самарали фаолият олиб бориши учун зарур шароитларни таъминлаш бўйича аниқ топшириқлар берилди.
Шунингдек, биноларнинг ички ва ташқи кўриниши, муҳандислик-коммуникация тизимлари ҳамда хизмат хоналарининг жиҳозланишига алоҳида эътибор қаратиш вазифаси юклатилди.
Наманган вилояти ИИБ Ахборот хизмати