Ўзбекистон Республикаси Ички ишлар вазирлиги

Корея халқаро ҳамкорлик агентлиги (KOICA) лойиҳаси доирасида Ўзбекистон Республикаси ички ишлар органлари ходимларини ўқитиш ва уларнинг малакасини ошириш тизимини такомиллаштириш бўйича “Бош режа”ни ишлаб чиқиш мақсадида делегациямиз аъзолари айни вақтда Корея Республикасида хизмат сафарида бўлиб турибди.

Тренинг дастурига мувофиқ, делегация Корея Миллий полиция университети, Полиция кадрларини ривожлантириш институти ва Корея Марказий полиция академиясида бўлади.

Ташрифлар давомида Корея Республикасида ички ишлар органлари ходимларини касбий тайёрлаш, қайта тайёрлаш ва малакасини оширишнинг замонавий усуллари, ўқув жараёнини ташкил этиш механизмлари ҳамда илғор педагогик технологияларни қўллаш тажрибаси ўрганилмоқда.

Шу билан бирга, полиция ходимларининг амалий кўникмаларини шакллантириш, хизмат фаолиятига замонавий ёндашувларни жорий этиш ва кадрлар салоҳиятини оширишга қаратилган тизимлар билан яқиндан танишилмоқда.

Шунингдек, Сонгёнг патруль полиция бўлинмаси ва Чхонан-Сеобук полиция станциясига ҳамда Сеул шаҳрида CPTED (муҳитни лойиҳалаш орқали жиноятчиликнинг олдини олиш) лойиҳалари амалга оширилган ҳудудларга ташриф уюштирилади.

Ўрганилган илғор тажриба ва амалий ёндашувлар Ўзбекистон Республикаси ички ишлар органлари ходимларини тайёрлаш ва малакасини ошириш тизимини янада такомиллаштириш, таълим жараёнининг самарадорлигини ошириш ҳамда соҳада замонавий стандартларни жорий этиш бўйича “Бош режа”ни ишлаб чиқишда муҳим аҳамият касб этади.

Ташриф якунида Корея томонининг илғор тажрибасини миллий тизимга татбиқ этиш бўйича тегишли таклиф ва тавсиялар шакллантирилади.

ИИВ Малака ошириш институти