ИИВ Хавфсиз туризмни таъминлаш бош бошқармаси раҳбарияти томонидан Бухоро вилоятида хавфсиз туризмни таъминлаш борасидаги хизмат ишларининг ташкил этилиши ва вазифалар ижроси кўриб чиқилди
2026-11-05 10:40:00 / Янгиликлар

Ўзбекистон Республикаси ИИВ Хавфсиз туризмни таъминлаш бош бошқармаси бошлиғи, полковник Э.М. Алкаров Бухоро вилояти ИИБ Хавфсиз туризмни таъминлаш бошқармасида бўлиб, ходимларнинг хизмат фаолияти, юклатилган вазифалар ижроси ҳамда хизматни ташкил этиш жараёнларини ўрганди.
Ташриф доирасида республикамиз бўйлаб ўтказилаётган “Хавфсиз ва соғлом юрт” тезкор-профилактик тадбирининг учинчи босқичи муносабати билан шахсий таркиб учун хизматолди йўриқномаси ўтказилди.
Унда жамоат тартибини сақлаш, фуқаролар ва хорижий сайёҳлар хавфсизлигини ишончли таъминлаш, ҳуқуқбузарликларнинг барвақт олдини олиш ҳамда туристик ҳудудлардаги осойишталикни мустаҳкамлаш масалалари асосий эътибор марказида бўлди.
Раҳбарият ҳар бир ходимга ўз вазифасига масъулият билан ёндашиш, ҳушёрликни ошириш, қонунийлик ва хизмат интизомига қатъий риоя этиш бўйича аниқ кўрсатма ва тавсиялар берди.
Айниқса, Бухоро шаҳрининг тарихий ҳудудларида профилактик тадбирлар самарадорлигини ошириш, сайёҳлар билан мулоқотда юксак муомала маданиятини намоён этиш ва юзага келиши мумкин бўлган салбий ҳолатларни тезкорлик билан бартараф этиш устувор вазифа сифатида белгиланди.
Юртимиз меҳмонларининг хавфсизлиги ва хотиржамлигини таъминлаш нафақат хизмат бурчи, балки мамлакатимизнинг халқаро нуфузи ва туристик жозибадорлигини оширувчи муҳим омил эканлиги алоҳида таъкидланди.
Тадбир якунида шахсий таркиб олдига галдаги аниқ вазифалар қўйилиб, хизмат фаолиятида ташаббускорлик, фидойилик ва юқори масъулиятни намоён этиш зарурлиги эслатиб ўтилди.
Бухоро вилояти ИИБ Ахборот хизмати





