Ўзбекистон Республикаси Ички ишлар вазирлиги

Ўзбекистон Республикаси Ички ишлар вазири генерал-лейтенант Азиз Ташпулатов Бухоро вилоятида бўлиб, ҳудудда ички ишлар органлари фаолиятини такомиллаштириш ва жамоат хавфсизлигини таъминлаш борасида амалга оширилаётган чора-тадбирлар билан танишди.

Тадбир жараёнида Бухоро шаҳар Ички ишлар органлари фаолиятини мувофиқлаштириб бошқармасида «Хавфсиз ва соғлом юрт» ойлиги доирасида ташкил этилган тезкор штаб фаолияти билан танишилиб, масъулларнинг ҳисоботлари тингланди. Бухоро шаҳри ҳудудида жиноятчиликни жиловлаш, ҳуқуқбузарликларнинг барвақт олдини олиш ва маҳаллалар кесимида профилактик ишларнинг натижадорлигини ошириш зарурлигини таъкидлади. Бу борада кунлик хизмат фаолиятини таҳлил қилиш ва раҳбарларнинг шахсий масъулиятини кучайтириш бўйича топшириқлар берилди.

Вилоят ИИБ Патруль-пост хизмати батальонида ходимларнинг жисмоний тайёргарлигини ошириш ҳамда хизмат вазифасини бажариш учун яратилган шароитлар кўздан кечирилди. Батальон инфратузилмасини такомиллаштириш, саф майдонини кенгайтириш ва ҳудудни замонавий талаблар асосида реконструкция қилиш юзасидан кўрсатмалар берилди.

Когон тумани ИИБда моддий-техник таъминот ва ходимлар учун яратилган хизмат шароитлари ўрганилди. Хизмат жараёнларига замонавий ахборот технологияларини кенг жорий этиш, рақамлаштириш имкониятларидан самарали фойдаланиш ҳамда ҳуқуқбузарликларнинг олдини олиш борасидаги ишларни кучайтириш вазифалари белгиланди.

Хизмат сафари доирасида ички ишлар вазири ҳузурида Бухоро вилоятида жамоат хавфсизлигини таъминлашни янги босқичга олиб чиқиш ва Ўзбекистон Республикаси Президентининг вилоятга ташрифи давомида белгилаб берилган вазифалар ижросига бағишланган тезкор йиғилиш ҳам ўтказилди.

Унда Давлатимиз раҳбарининг 2026 йил 3 ноябрь куни Бухоро вилоятига ташрифи чоғида илгари сурилган ташаббуслар, жумладан, умумий қиймати 30 млрд АҚШ долларига тенг инвестиция лойиҳаларини амалга ошириш, асосий кўчаларни реконструкция қилиш, янги автомобиль ва темир йўл тармоқларини барпо этиш ҳамда туризм инфратузилмасини ривожлантириш жараёнларида жамоат хавфсизлигини таъминлаш масалалари муҳокама қилинди.

Шунингдек, келгуси йилда Бухоро шаҳрида ўтказилиши режалаштирилган нуфузли халқаро тадбирларга пухта тайёргарлик кўриш, меҳмонлар ва иштирокчилар хавфсизлигини таъминлаш, транспорт ҳаракатини самарали ташкил этиш бўйича устувор вазифалар белгилаб олинди.

Жамоат хавфсизлигини таъминлашда рақамли технологиялардан фойдаланишни кенгайтиришга алоҳида эътибор қаратилди. Хусусан, автомобиль йўлларини рақамли мониторинг билан қамраб олиш ҳамда туризм марказларида хавфсизликни таъминлаш механизмларини такомиллаштириш бўйича аниқ таклифлар ишлаб чиқиш топширилди.

Йўл ҳаракати хавфсизлигини таъминлаш, транспорт оқимини самарали бошқариш ва махсус тадбирлар давомида ҳаракат узлуксизлигини таъминлаш мақсадида махсус «яшил йўлаклар» ташкил этиш вазифаси ҳам белгиланди. Ушбу йўналишда Ички ишлар вазирининг биринчи ўринбосари ва Йўл ҳаракати хавфсизлиги хизмати бошлиғи шахсан масъул этиб белгиланди.

Йиғилиш якунида Давлатимиз раҳбари томонидан Бухоро вилоятида замонавий инфратузилма ва янги қиёфадаги ички ишлар органларини шакллантириш, жамоат хавфсизлигини таъминлаш ҳамда хизмат самарадорлигини ошириш бўйича белгилаб берилган барча вазифаларни ўз вақтида ва сифатли бажариш ҳар бир раҳбар ва ходимнинг устувор масъулияти эканини алоҳида таъкидланиб, масъулларга белгиланган вазифалар ижроси юзасидан мунтазам ҳисобот бериш тизимини йўлга қўйиш вазифаси юклатилди.