Наманган вилоятида “Хавфсиз ва соғлом юрт” кенг кўламли тезкор-профилактик тадбирларининг учинчи босқичи доирасида вилоят раҳбарлари иштирокида хизмат олди йўриқномаси ўтказилди
2026-11-03 20:00:00 / Янгиликлар
Жорий йилнинг 1 ноябридан 1 декабрига қадар республикамизнинг барча ҳудудларида “Хавфсиз ва соғлом юрт” кенг кўламли тезкор-профилактик тадбирларининг учинчи босқичи ўтказилмоқда. Мазкур тадбирлар аҳоли саломатлиги ва миллат генофондини гиёҳвандлик ҳамда наркожиноятлардан ишончли ҳимоя қилишга қаратилган.
Жумладан, бугун Давлатобод тумани ҳудудида вилоят ҳокими Шавкатжон Абдураззоқов ҳамда ҳуқуқни муҳофаза қилувчи органлар раҳбарлари иштирокида хизмат олди йўриқномаси ўтказилди. Унда Ички ишлар бошқармаси, Миллий гвардия, Фавқулодда вазиятлар бошқармаси ходимлари, шунингдек, мазкур идораларнинг ҳудудий бўлинмалари раҳбарлари ва туман ҳокимлари видеоселектор орқали иштирок этдилар.
Йўриқнома давомида “Хавфсиз ва соғлом юрт” кенг кўламли тезкор-профилактик тадбирлари доирасида кучайтирилган тартибда хизмат олиб бориш, жамоат тартибини сақлаш, жиноят ва ҳуқуқбузарликларнинг олдини олиш, фуқаролар билан манзилли ишлаш ҳамда ҳудудларда барқарор криминоген вазиятни таъминлаш юзасидан аниқ вазифалар белгилаб берилди.
Шунингдек, хизматни самарали ташкил этиш, ходимларнинг ҳушёрлиги ва шахсий масъулиятини янада ошириш, хизмат интизоми ҳамда қонунчилик талабларига қатъий риоя этиш, фуқаролар билан мулоқот маданиятига амал қилиш бўйича тегишли топшириқлар берилди.
Наманган вилояти ИИБ Ахборот хизмати