Наманганда «Хавфсиз ва соғлом юрт», куз-қиш мавсумига тайёргарлик ҳамда хизмат интизоми масалалари муҳокама қилинди
2026-11-03 09:00:00 / Янгиликлар
Наманган вилояти ички ишлар бошқармаси биносида Ички ишлар вазири ўринбосари — Маънавий-маърифий ишлар ва кадрлар билан таъминлаш департаменти бошлиғи, полковник Диёрбек Саттаров раҳбарлигида йиғилиш бўлиб ўтди.
Унда вилоят ички ишлар органлари томонидан жорий йилнинг 10 ойи давомида амалга оширилган ишлар, хусусан, кадрлар билан ишлаш, хизмат интизоми ва қонунийлик ҳолати, ходимларнинг масъулияти ҳамда шахсий жавобгарлигини ошириш масалалари танқидий-таҳлилий руҳда кўриб чиқилди.
Шунингдек, «Хавфсиз ва соғлом юрт» тезкор-профилактик тадбирлари доирасида жиноятчилик ва ҳуқуқбузарликларнинг олдини олиш, жамоат хавфсизлигини таъминлаш борасида амалга оширилаётган ишлар муҳокама қилинди.
Куз-қиш мавсумига тайёргарлик ҳолати эса жойига чиққан ҳолда, Уйчи тумани мисолида ўрганилди. Жумладан, туман ички ишлар бўлимида ташкил этилган штаб фаолияти, кунлик иш жараёни, хизмат биноларининг мавсумга тайёргарлиги, иситиш тизимларининг созлиги ҳамда ходимлар учун яратилган хизмат ва маиший шароитлар кўздан кечирилди.
Йиғилиш ва ўрганишлар якунида аниқланган камчиликларни бартараф этиш, хизмат интизоми ва қонунийликни мустаҳкамлаш, куз-қиш мавсумини беталафот ўтказиш ҳамда тезкор-профилактик тадбирлар самарадорлигини ошириш юзасидан масъулларга аниқ вазифа ва топшириқлар белгилаб берилди.