Очиқ мулоқот ва амалий натижа: Ички ишлар органларида сайёр қабуллар аҳоли муаммоларини ҳал этишнинг самарали омилига айланмоқда
2026-11-01 08:00:00 / Янгиликлар
Жамият ва давлат ўртасидаги ишонч муҳитини мустаҳкамлаш, фуқароларни ўйлантираётган масалаларга оқилона ечим топиш ҳамда аҳоли билан бевосита мулоқотни янги босқичга олиб чиқиш мақсадида ички ишлар органлари томонидан жойларда сайёр қабуллар изчил ва тизимли равишда ўтказиб келинмоқда.
Бу каби амалий учрашувлар фуқаролардан келиб тушаётган ҳар бир мурожаатни атрофлича ва холисона таҳлил қилиш, уларнинг қонуний манфаатларини муносиб ҳимоялаш ҳамда юзага келаётган муаммоларни қисқа муддатларда бартараф этишга хизмат қилмоқда.
Шу каби хайрли ташаббусларнинг навбатдагиси жорий йилнинг 31-октябр куни Ички ишлар вазири генерал-лейтенант Азиз Ташпулатов бошчилигида бўлиб ўтди.
Тадбирда вазир ўринбосарлари, соҳавий тузилмалар раҳбарлари ҳамда масъул ходимлар иштирок этиб, жисмоний ва юридик шахсларнинг мурожаатларини атрофлича кўриб чиқиш, улар юзасидан амалий чора-тадбирлар белгилаш ва ҳар бир масалага аниқ ҳуқуқий баҳо беришга алоҳида эътибор қаратдилар.
Тадбир мурожаатчилар учун максимал даражада енгил ва қулай шаклда ташкил этилди. Тошкент шаҳри ва Тошкент вилоятида истиқомат қилувчи аҳоли вакиллари тизим раҳбарияти билан бевосита юзма-юз мулоқотда бўлган бўлса, Қорақалпоғистон Республикаси ҳамда узоқ ҳудудларда яшовчи фуқаролар замонавий видеоконференцалоқа воситалари орқали жараёнга қўшилиб, ўзларини қийнаётган масалаларни бевосита етказиш имкониятига эга бўлдилар.
Сермаҳсул ўтган учрашув якунларига кўра, жами 481 та мурожаат рўйхатга олиниб, уларнинг 236 таси ёки 49 фоизи бевосита қабулнинг ўзида ижобий ечимини топди. Қўшимча ўрганиш ва суриштирув талаб этган 245 та мурожаатнинг ижроси қатъий назоратга олиниб, тегишли соҳавий хизматларга йўналтирилди.
Шу билан бир вақтда, Қорақалпоғистон Республикаси, Тошкент шаҳри ва вилоятлар ички ишлар бошқармалари раҳбарлари томонидан ўтказилган қабулларда ҳам жами 199 та мурожаат кўриб чиқилди. Уларнинг 74 таси, яъни 37 фоизи жойида ҳал этилган бўлса, қолган 125 та мурожаат бўйича қўшимча текширув ўтказиш ва ҳуқуқий ечим ишлаб чиқиш юзасидан тегишли чора-тадбирлар белгиланди.
Хулоса ўрнида айтиш мумкинки, сайёр қабуллар аҳоли ва давлат ҳокимияти ўртасидаги самимий ва дўстона мулоқотни янада мустаҳкамлаш, фуқаролар муаммоларига тезкорлик билан ечим топиш ҳамда ички ишлар органлари фаолиятининг очиқлиги ва самарадорлигини оширишда муҳим аҳамият касб этмоқда.
Бу каби манзилли ва амалий учрашувлар келгусида ҳам мамлакатимизнинг барча ҳудудларида мунтазам равишда давом эттирилади.