Наманган вилояти ИИБда 25 октябрь — Ички ишлар органлари ходимлари куни ва тизим ташкил этилганининг 35 йиллиги муносабати билан байрам тадбирлари давом эттирилиб, бир гуруҳ ходимлар тақдирланди
2026-10-27 12:05:00 / Янгиликлар
Ички ишлар органлари ходимлари куни муносабати билан ташкил этилган байрам тадбирлари Наманган вилояти Ички ишлар бошқармасида давом эттирилди.
Тантанали маросимда бошқарма раҳбарияти, соҳавий хизматлар раҳбарлари, шахсий таркиб ҳамда ички ишлар органлари фахрийлари иштирок этди.
Тадбир давомида вилоят ИИБ бошлиғи, полковник Шуҳрат Алиев сўзга чиқиб, шахсий таркиб ва фахрийларни касб байрами билан самимий муборакбод этди ҳамда Ўзбекистон Республикаси Ички ишлар вазирининг байрам табригини ўқиб эшиттирди.
Маросим давомида юрт тинчлиги ва халқ осойишталигини таъминлаш, жиноятчиликка қарши курашиш ҳамда жамоат хавфсизлигини мустаҳкамлаш йўлида муносиб хизмат қилаётган бир гуруҳ раҳбар ва ходимлар тақдирланди.
Хусусан, хизмат фаолиятида юқори натижаларга эришган ходимларга Ички ишлар вазирлигининг «Аъло хизматлари учун», биринчи, иккинчи ва учинчи даражали «Бенуқсон хизматлари учун», «Ички ишлар вазирлигининг 35 йиллиги» эсдалик нишонлари, эсдалик қўл соатлари, китоблар тўплами топширилди. Шунингдек, бир гуруҳ ходимларга муддатидан олдин навбатдаги махсус унвонлар берилди. Бундан ташқари, вилоят ИИБ бошлиғининг тегишли буйруғига асосан бир гуруҳ ходимлар эса эсдалик қўл соатлари билан рағбатлантирилди.
Тақдирланган ходимлар ва фахрийлар билдирилган ишонч ҳамда эътироф учун миннатдорлик билдириб, келгусида ҳам хизмат вазифаларини юксак масъулият ва фидойилик билан бажаришга тайёр эканликларини қайд этдилар.
Наманган вилояти ИИБ Ахборот хизмати