Ўзбекистон Республикаси Ички ишлар вазирлиги

«ИИБ бошлиғи кубоги» учун икки ҳудуд оммавий ахборот воситалари вакилларидан иборат тўртта жамоа ўзаро беллашди.

Жиззах вилоятида хотин-қизлар ўртасида соғлом турмуш тарзини тарғиб қилиш, спортга бўлган қизиқишни ошириш, шунингдек, ҳудудлар ўртасидаги дўстона ҳамкорликни мустаҳкамлаш мақсадида волейбол мусобақаси ташкил этилди.

«ИИБ бошлиғи кубоги» учун ўтказилган мазкур мусобақада Жиззах ва Сирдарё вилоятларида фаолият юритаётган оммавий ахборот воситаларида меҳнат қилувчи журналист аёллардан иборат тўртта жамоа иштирок этди.

Мусобақа давомида иштирокчилар нафақат спорт маҳорати, балки жамоавий ҳамжиҳатлик, ўзаро қўллаб-қувватлаш ва ғалабага бўлган интилишларини ҳам намоён этдилар.

Майдонда кечган қизғин ва муросасиз баҳслар томошабинларга кўтаринки кайфият бағишлади. Ҳар бир жамоа муносиб натижа кўрсатиш, рақибларидан устун келиш ва кубок соҳиби бўлиш учун бор куч-ғайратини ишга солди.

Волейбол баҳслари давомида спортчиларнинг чаққонлиги, эпчиллиги ва жамоавий ўйин олиб бориш маҳорати яққол кўзга ташланди.

Мусобақа иштирокчилари учун бу тадбир нафақат ўз маҳоратларини синовдан ўтказиш, балки ҳамкасблар билан яқиндан танишиш, тажриба алмашиш ва дўстона муносабатларни мустаҳкамлаш учун ҳам ўзига хос имконият бўлди.

Мусобақанинг якуний натижаларига кўра, учинчи ўрин Жиззах вилояти телерадиокомпанияси жамоасига насиб этди. Иккинчи ўринни Сирдарё вилоятининг «Янги Сирдарё» газетаси жамоаси эгаллади.

Фахрли биринчи ўрин эса ўзининг муносиб ўйини ва юқори натижаси билан ажралиб турган «Жиззах ҳақиқати — Джизакская правда» газеталари жамоасига насиб этди. Ғолиб жамоа «ИИБ бошлиғи кубоги» соҳиби бўлди.

Тақдирлаш маросимида Жиззах вилояти ИИБ бошлиғи, волейбол федерацияси раҳбари Ғайрат Қодиров иштирок этиб, мусобақа ғолиблари ва совриндорларини самимий табриклади.

Ушбу каби спорт тадбирлари жамоалар ўртасидаги ҳамкорликни ривожлантириш, аҳоли, хусусан, хотин-қизлар ўртасида жисмоний фаолликни кенг тарғиб этишда муҳим аҳамият касб этиши таъкидланди.

Маросим якунида ғолиб ва совриндор жамоаларга қимматбаҳо совғалар топширилди. Иштирокчиларга келгуси фаолиятида муваффақиятлар, янги ютуқлар ва спорт мусобақаларида янада юксак натижалар тилаб қолинди.

Шу тариқа, «ИИБ бошлиғи кубоги» доирасидаги волейбол мусобақаси нафақат спорт беллашуви, балки икки вилоят журналист аёлларини бир майдонда жамлаган, дўстлик, ҳамжиҳатлик ва соғлом рақобат руҳини ўзида мужассам этган тадбир сифатида ёдда қолди.

Жиззах вилояти ИИБ Ахборот хизмати