Бухоро вилояти ИИБ раҳбарияти янги маъмурий бино қурилишини кўздан кечирди
2026-10-16 09:00:00 / Янгиликлар
Маълумки, бугунги кунда ички ишлар органлари тизимида амалга оширилаётган ислоҳотларнинг туб моҳияти нафақат ходимлар сафини малакали кадрлар билан тўлдириш, балки уларнинг самарали хизмат олиб боришлари учун замон талабларига мос инфратузилмани яратишга қаратилган.
Шу мақсадда, Бухоро вилояти Ички ишлар бошқармаси учун барпо этилаётган янги маъмурий бинодаги қурилиш-монтаж ишлари айни қизғин паллага кирган.
Вилоят ИИБ бошлиғи мазкур объектга ташриф буюриб, бунёдкорлик ишларининг бориши, лойиҳа асосида амалга оширилаётган жараёнлар ва қурилиш материалларининг сифати билан яқиндан танишди.
Ташриф давомида бошқарма бошлиғи қурилишга масъул бўлган пудратчилар ва муҳандислар билан бевосита мулоқот қилди.
Суҳбат чоғида бино нафақат кўркам ва замонавий қиёфага эга бўлиши, балки узоқ йиллар давомида халқимизга ва тизим ходимларига беминнат хизмат қилиши лозимлиги алоҳида таъкидланди.
Раҳбар қурувчилар олдига иккита асосий талабни қўйди.
Хусусан, янги бинода ҳар бир ғиштнинг тўғри қўйилишидан тортиб, пардозлаш ишларигача халқаро стандартларга тўлиқ жавоб бериши шартлиги, шунингдек, белгиланган муддатларда ишларни якунлаш, аммо шошма-шошарлик эвазига сифатнинг тушиб кетишига асло йўл қўймаслик зарурлиги таъкидланди.
Тадбир давомида, бинода ходимлар ва мурожаат билан келувчи фуқаролар учун яратиладиган қулайликлар, рақамли технологияларни жорий этиш имкониятлари ҳам кўздан кечирилди.
Аниқланган айрим камчиликларни бартараф этиш ва иш суръатини ошириш юзасидан масъулларга тегишли кўрсатмалар берилди.
Бухоро вилояти ИИБ Ахборот хизмати