Ўзбекистон Республикаси Ички ишлар вазирлиги

Маънавиятни тест билан ўлчаб бўладими? Бошқаларга интизом, касбга садоқат ва ватанпарварлик ҳақида гапираётган инсоннинг ўзи қандай бўлиши керак? Хоразм вилояти ички ишлар органлари ходимлари ўртасида ўтказилган «Энг яхши маънавий-маърифий ишлар тарғиботчиси» кўрик-танлови ана шундай саволлар ҳақида ўйлашга ундади.

Беллашувда вилоят ИИБнинг соҳавий хизматлари ҳамда шаҳар-туман ички ишлар органлари бошлиқларининг маънавий-маърифий ишлар бўйича ўринбосарлари қатнашди. Иштирокчилар тест синовларидан ўтиб, хизмат фаолиятига оид назарий билимларини намоён этдилар. Шунингдек, бу сафар уларнинг жисмоний ва жанговар тайёргарлиги ҳам баҳоланди.

Бир қарашда маънавият билан жисмоний тайёргарлик бир-биридан узоқ тушунчалардек туюлиши мумкин. Аслида эса ички ишлар органлари ходимининг хизматида билим, интизом, жисмоний тайёргарлик ва шахсий намуна бир-бирини тўлдиради. Чунки бошқаларга «интизомли бўл», «касбингга садоқатли бўл» дейдиган раҳбар, аввало, ўз фаолияти билан бунга намуна кўрсата олиши керак.

Танлов якунларига кўра, 3-ўринни Хива шаҳар ИИБ бошлиғининг маънавий-маърифий ишлар бўйича ўринбосари, подполковник Жаҳонгир Раҳметов, 2-ўринни вилоят ИИБ ЖХХ ЙҲХБ бошлиғининг маънавий-маърифий ишлар бўйича ўринбосари, майор Шуҳрат Яқубов эгаллади. Фахрли 1-ўрин эса Боғот тумани ИИБ бошлиғининг маънавий-маърифий ишлар бўйича ўринбосари, майор Зафар Бекжоновга насиб этди. У танловнинг республика босқичида иштирок этиш ҳуқуқини қўлга киритди.

Ғолиблик, табиийки, қувончли, аммо бу йўналишда биринчи бўлишнинг масъулияти ҳам бор. Чунки маънавий-маърифий ишлар тарғиботчисини жамоа нафақат айтган сўзлари, балки амалий фаолияти, кундалик хатти-ҳаракатлари орқали ҳам баҳолайди.

Майор Зафар Бекжонов билан суҳбатимизда ҳам асосий эътибор айнан шахсий намунага қаратилди.

— Менимча, ходимга маънавият ҳақида гапиришдан аввал раҳбарнинг ўзи шу фазилатларни амалда кўрсата олиши керак. Жамоа сўздан кўра инсоннинг ўзини кўпроқ кузатади, ундан ўрнак олади, — дейди у.

Дарҳақиқат, маънавий-маърифий ишлар фақат тадбир ўтказиш ёки маъруза қилишдан иборат эмас. Ходимнинг кайфиятини ҳис этиш, муаммосини тинглаш, ёш ходимга касб шарафини англатиш, керак бўлса, бир оғиз сўз билан уни руҳлантириш ҳам бу йўналишнинг муҳим жиҳатларидан.

Ички ишлар органлари ходими ҳам, аввало, инсон. Унинг ҳам оиласи, ташвиши, чарчайдиган паллалари бор. Тунги навбатчилик, мураккаб хизмат вазифалари, фуқаролар билан мулоқот — буларнинг барчаси ундан руҳий ва жисмоний бардошлиликни талаб қилади. Ана шундай пайтда жамоа билан ишлайдиган раҳбарнинг сезгирлиги алоҳида аҳамият касб этади.

Шунинг учун маънавий-маърифий ишлар самарадорлигини фақат ўтказилган тадбирлар сони билан баҳолаб бўлмайди. Унинг натижаси жамоадаги муҳитда, ходимнинг хизматга муносабатида, муомала маданиятида ва касбий масъулиятида намоён бўлади.

— Биринчи ўринни мен ғалабадан кўра кўпроқ масъулият деб биламан. Энди республика босқичида вилоятимиз шаънини муносиб ҳимоя қилиш керак, — дейди танлов ғолиби.

Тадбир якунида ғолиб ва фаол қатнашчилар дипломлар, ташаккурномалар ҳамда қимматбаҳо эсдалик совғалари билан тақдирланди. Қарсаклар янгради, илғорлар эътироф этилди. Аммо маънавият тарғиботчиси учун ҳақиқий синов танлов тугаганидан кейин ҳам давом этади. Эртаси куни яна хизмат, яна жамоа, яна одамлар билан мулоқот.

© «Postda» газетаси, Нилуфар Жабборова, Хоразм вилояти.