Сирдарё вилояти ИИБ раҳбарияти томонидан Гулистон шаҳрида жамоат хавфсизлигини таъминлаш ва жиноятчиликнинг олдини олиш борасидаги ишлар ўрганилди
2026-10-07 09:00:00 / Янгиликлар
Сирдарё вилояти Ички ишлар бошқармаси бошлиғи, полковник Сардор Мирзараимов томонидан Гулистон шаҳрида маҳаллалар кесимида жиноят ва ҳуқуқбузарликларнинг олдини олиш, Жамоат хавфсизлигини таъминлаш ҳамда аҳоли билан манзилли ишлаш борасида амалга оширилаётган ишлар ҳолати ўрганилди.
Ўрганишлар дастлаб “Боғишамол” маҳалла фуқаролар йиғинида олиб борилиб, “маҳалла еттилиги” фаолияти, хусусан, профилактика инспектори ҳамда кўчабошилар ўртасидаги ҳамкорлик ҳолати таҳлил қилинди.
Шунингдек, профилактика инспекторининг хизмат фаолиятига оид ҳужжатлар, кунлик аризалар ва фуқаролар мурожаатлари билан ишлаш жараёни кўздан кечирилди.
“Шодлик” маҳалла фуқаролар йиғинида ҳам профилактика инспекторининг хизмат фаолияти, ҳудудда Жамоат хавфсизлигини таъминлаш, жиноят ва ҳуқуқбузарликларнинг барвақт олдини олиш, фуқаролар мурожаатларини ўрганиш ҳамда кунлик иш юритувидаги аризалар билан ишлаш ҳолатига алоҳида эътибор қаратилди.
Ўрганиш давомида профилактика инспекторининг хизмат уйи ҳам кўздан кечирилиб, ходим учун яратилган шарт-шароитлар, хизмат вазифаларини самарали амалга ошириши учун мавжуд имкониятлар ўрганилди.
Шунингдек, 1-сонли Ички ишлар бўлимида ходимлар учун яратилган хизмат шароитлари, мавжуд имкониятлар билан ҳам танишилди.
“Обод юрт” маҳалласида истиқомат қилувчи эҳтиёжманд оила хонадонига ҳам борилиб, Ички ишлар органлари кўмагида қурилиш ишлари кўздан кечирилди.
Ўрганишлар якунида ҳудудларда жиноят ва ҳуқуқбузарликларнинг олдини олиш, аҳоли осойишталигини таъминлаш, жамоат хавфсизлигини янада мустаҳкамлаш юзасидан масъулларга аниқ топшириқ ва вазифалар белгилаб берилди.
Сирдарё вилояти ИИБ Ахборот хизмати