Сурхондарё вилояти ҳуқуқни муҳофаза қилувчи органлар ходимлари ва ҳарбий хизматчилар ўртасида спортнинг «Қўл жанги» тури бўйича мусобақа ўтказилди
2026-10-01 09:00:00 / Янгиликлар
Ўзбекистон Республикаси ИИВ “Динамо” Жисмоний тарбия ва спорт жамияти Сурхондарё вилоят Кенгашининг календар режасига асосан, жорий йилнинг 28-29 сентябр кунлари Термиз шаҳридаги вилоят ИИБ спорт мажмуасида Ҳуқуқни муҳофаза қилувчи органлар ходимлари ва ҳарбий хизматчилар ўртасида спортнинг “Қўл жанги” тури бўйича “Динамо” ЖТСЖ Сурхондарё вилояти Кенгаши биринчилиги мусобақаси ўтказилди.
Спорт мусобақаси муросасиз баҳсларга бой бўлиб, унда Сурхондарё вилояти Ички ишлар бошқармаси, Фавқулодда вазиятлар бошқармаси, Миллий гвардия бошқармаси, Давлат хавфсизлик хизмати Сурхондарё вилояти бошқармаси, Божхона бошқармаси, ИИВ Жазони ижро етиш департаментининг 9-сон Тергов ҳибсхонаси, “Термиз” халқаро аеропортида хавфсизликни таъминлаш бўйича алоҳида баталъон ҳамда ДХХ Чегара қўшинлари “Жануб” ОҚнинг соҳавий хизматлари, бўлим ва бўлинмалари ходимларидан иборат жами 12 та терма жамоадан 8 та вазн тоифасида 50 нафар спортчи иштирок етди.
Халқаро тоифадаги ҳакамлар томонидан баҳолаб борилган ушбу нуфузли мусобақа натижаларига кўра, 3-ўринни Сурхондарё вилояти Миллий гвардия бошқармаси терма жамоаси, 2-ўринни вилоят ИИБ Қўриқлаш бошқармаси терма жамоаси егаллаган бўлса, фахрли 1-ўринни Сурхондарё вилояти Ички ишлар бошқармаси ТВБСО терма жамоаси қўлга киритди.
Ғолиблар Ўзбекистон Республикаси ИИВ “Динамо” ЖТСЖ Сурхондарё вилояти Кенгаши томонидан диплом, медал, кубок ва қимматбаҳо есдалик совғалари билан тақдирландилар.
Сурхондарё вилояти ИИБ Ахборот хизмати