ИИВ раҳбарияти томонидан Қашқадарё вилоятида ҳуқуқбузарликлар профилактикаси ва жамоат хавфсизлиги юзасидан ўрганиш ишлари олиб борилди
2026-09-28 09:00:00 / Янгиликлар
Ички ишлар вазирлиги Жамоат хавфсизлиги департаменти Ҳуқуқбузарликлар профилактикаси хизмати бошлиғи, полковник Уралов Шароф Уразалиевич томонидан Қашқадарё вилоятида ҳуқуқбузарлик ва жиноятларнинг барвақт олдини олиш, профилактика инспекторлари фаолиятини такомиллаштириш ҳамда белгиланган вазифалар ижросини ўрганишга қаратилган ишлар олиб борилди.
Ўрганишлар давомида Ўзбекистон Республикаси Президентининг 314-сонли қарорида белгиланган вазифаларнинг мазмун-моҳияти ҳар бир профилактика инспекторига етказилиб, қарор талабларининг жойларда тўлиқ ва сифатли ижросини таъминлаш юзасидан тегишли тушунтиришлар берилди.
Шунингдек, Қамаши туманидаги маҳаллаларда бўлиб, маҳалла еттилиги фаолияти, ҳудуддаги криминоген вазият, содир этилаётган жиноятларнинг келиб чиқиш сабаблари ҳамда фуқаролардан келиб тушаётган мурожаатларнинг ўрганилиши ҳолати таҳлил қилинди.
Аниқланган муаммоларни бартараф этиш, жиноят ва ҳуқуқбузарликларнинг барвақт олдини олиш, фуқаролар мурожаатлари билан ишлаш самарадорлигини ошириш ҳамда маҳалла еттилиги фаолиятини янада кучайтириш юзасидан масъулларга тегишли топшириқ ва кўрсатмалар берилди.
Шундан сўнг Қамаши тумани ИИБ биносида ҳудудда содир этилаётган жиноятларнинг муҳокамасига бағишланган йиғилиш ўтказилди. Унда Қашқадарё вилояти ИИБ бошлиғи, полковник Абдувоҳид Исмоилов ҳамда Ички ишлар вазирлиги Жамоат хавфсизлиги департаменти Ҳуқуқбузарликлар профилактикаси хизмати бошлиғи, полковник Уралов Шароф Уразалиевич иштирок этди.
Йиғилишда ҳудудда жиноятларнинг содир этилишига сабаб бўлаётган омиллар чуқур таҳлил қилиниб, уларнинг барвақт олдини олиш, профилактик тадбирларни манзилли ташкил этиш, муаммоли ҳудудлар ва тоифалар билан индивидуал ишлаш масалаларига алоҳида эътибор қаратилди.
Аниқланган камчиликларни бартараф этиш ҳамда келгусида жиноятларнинг олдини олиш бўйича масъулларга тегишли топшириқ ва кўрсатмалар берилди.
Ўрганиш ишлари Қарши шаҳрида ҳам давом эттирилди. Хусусан, 1-сонли ҳуқуқ-тартибот масканида бўлиб, ушбу масканда фуқаролар учун яратилган шароитлар, фаолиятни ташкил этиш ҳолати ҳамда масканга бириктирилган маҳаллалардан келиб тушаётган мурожаатлар билан ишлаш жараёни ўрганилди.
Мурожаатларда кўтарилаётган масалаларни ўз вақтида ва манзилли ҳал этиш, аҳоли билан ишлаш самарадорлигини ошириш, ҳудуддаги ҳуқуқбузарликларнинг барвақт олдини олиш ҳамда ҳуқуқ-тартибот маскани фаолиятини янада такомиллаштириш юзасидан масъулларга алоҳида топшириқлар берилди.
Ўрганишлар якунида белгиланган вазифалар ижросини таъминлаш, аниқланган камчиликларни бартараф этиш, профилактик ишларни янада кучайтириш ҳамда ҳудудларда жамоат хавфсизлигини таъминлаш борасидаги ишларни самарали ташкил этиш юзасидан масъулларга аниқ вазифалар белгилаб берилди.
Қашқадарё вилояти ИИБ Ахборот хизмати